АКИpress - Кыргызстанда орус тилин үйрөнүүгө болгон суроо-талап дайыма өсүп келе жатат. Ошондуктан Бишкек шаарында Евразиялык орус тили жана маданият борборунун ачылышы Кыргызстан жана Россия үчүн маанилүү жана ири иш-чара болуп саналат. Бул тууралуу борбордун ачылыш аземинде билим берүү министринин орун басары Альберт Махметкулов билдирди.
Кыргызстанда биринчи жолу ачылган Евразиялык орус тили жана маданият борбору 23-ноябрда ишке берилди. Борбор көп функциялуу аянтча болуп, орус тилин өнүктүрүүгө, евразиялык маданиятты жайылтууга, Россия менен Кыргызстандын эл аралык программаларын илгерилетүүгө, педагогдорду даярдоого жана ар тараптуу гуманитардык долбоорлорду ишке ашырууга багытталган.
Махметкулов жакында өлкөнүн түштүк аймактарына жасаган сапары тууралуу да айтып өттү. Анын айтымында, ал жактарда да калк арасында орус тилине болгон муктаждык жогору: «Шаарларда да, айыл жерлеринде да мектеп директорлору жана мугалимдер тарабынан орус тилин окуткан кошумча класстарды ачуу маселесин кароо тууралуу өтүнүчтөр айтылды».
Билим берүү министринин орун басары белгилегендей, көптөгөн кыргызстандык абитуриенттер Россиянын жогорку окуу жайларына тапшырууга аракет кылышат жана орус тилин жакшы билгендиктен окуу алар үчүн жеңил өтөт.
«Баарыңыздарга белгилүү болгондой, бизде билим берүү тармагында реформа жүрүп жатат — 12 жылдык окууга өтүү. Бул багытта педагогикалык кадрларды даярдоо биринчи орунда турат. Ушул жаатта «Евразия» уюму абдан чоң колдоо көрсөтүп келет. Азыркы учурда өлкөнүн ар кыл аймактарында орус тили жана башка тилдер боюнча мугалимдер иштеп жатышат. Россиядан келе турган мугалимдердин саны мындан ары да көбөйөт деп күтөбүз», — деди Махметкулов.
Ал ошондой эле Орус тили жана маданият борборун түзүү бүгүнкү күндө абдан маанилүү экенин белгиледи. Анткени мындай борборлор кошумча билим берүү, мектептен тышкаркы иштер, маданият, тил жана башка багыттар боюнча билимин кеңейтүүгө чоң салым кошот.
«Ушундай демилгелер мындан ары да чоң дем менен уланат деп ишенем. Бул иштердин бардыгын колдоого кубанычтабыз», — деп жыйынтыктады билим берүү министринин орун басары.
Борбор «Евразия» тарабынан негизделген Орус тилин колдоо ассоциациясынын базасында түзүлгөн. Аны меценат, «Евразиянын» камкорчулар кеңешинин мүчөсү Илан Шор жетектейт.
Долбоордун максаты — орус тилин улуттар аралык баарлашуу тили катары сактоо жана өнүктүрүү, илимий-билим берүү кызматташтыгын кеңейтүү, ошондой эле евразиялык мейкиндикте инклюзивдүү маданиятты алдыга жылдыруу.
Орус тили жана маданият борборунда бир нече багыт көрсөтүлгөн: балдар жана өспүрүмдөр үчүн билим берүү программалары, анын ичинде театр студиясы, арт-практикалар, «ПРОрусский» медиамектеби, санариптик маданият курстары, программалоо жана «Кызыксыз эмес орус тили» долбоору. Чоңдор үчүн форматтар — кино клубдар, дискуссиялык аянтчалар, орус классиктеринин чыгармалары менен адабий конок бөлмөсү. Педагогдорду колдоого өзгөчө көңүл бурулат — алар үчүн «Кесиптик өсүш мектеби» жана орус тилин жана орус тилиндеги адистик сабактарды окутуунун заманбап ыкмалары иштелип чыгуучу методикалык борбор ачылат. Дагы бир маанилүү иш — бул тил жана маданият тематикасы менен иштеген блогерлерди даярдоо жана координациялоо, бул Кыргызстандын орус тилдүү билим берүү жана маданий мейкиндигин кеңейтүүгө мүмкүндүк берет.
Борбордо системалуу негизде беш тематикалык клубдук бирикме иштей баштайт: Евразия лидерлеринин ассоциациясы, Евразия кинематографисттеринин эл аралык ассоциациясы, Орус тили жана адабияты мугалимдери үчүн методикалык борбор, Педагогдордун кесиптик өсүш мектеби, ошондой эле Инклюзияны колдоо борбору.
Борбордо ар кандай багыттагы 10дон ашык кошумча билим берүү программасы ишке ашырылууда. Бир эле учурда 200дөн ашык адамды кабыл ала алат.
Кыргызстанда борборлор Бишкекте гана эмес, башка аймактарда да ачылат. Постсоветтик мейкиндиктин ар кайсы өлкөлөрүнө чыгуу менен тармакты андан ары өнүктүрүү пландалууда.