АКИpress - 19-мартта Монополияга каршы жөнгө салуу кызматы Кыргызстанда курулуш сектору тез темп менен өсүп жатканын белгилеп, цемент рыногуна көңүл буруу талап кылынарын билдирди.
Статистикалык маалыматтарга ылайык, 2024-жылдын жыйынтыгы боюнча республикада цемент өндүрүүнүн көлөмү 3 млн 99 миң тоннаны түздү. Эгерде 2020-жылдан берки убакытты ала турган болсо, анда 5 жылдын ичинде өндүрүштүн көлөмү 1 млн 226,9 миң тоннага өскөн.
Өндүрүштүн эң жогорку көлөмү 2021-жылы катталган. Акыркы эки жыл туруктуу өсүштү көрсөтүүдө, бирок жайыраак темп менен.
Ушул жылдын январь айындагы цемент импорту боюнча маалымат сатып алуунун көлөмү 3,3 эсеге көбөйгөндүгүн көрсөттү. 2025-жылдын январь айынын жыйынтыгы боюнча 38 миң тонна цемент импорттолгон, анын ичинде:
- Казакстандан — 24,7 миң тонна;
- Өзбекстандан — 13,1 миң тонна;
- Ирандан — 189 тонна.
Башка өлкөлөрдөн цемент жеткирүү менен катар ишканалар ички өндүрүштү да көбөйтө башташты. Быйылкы жылдын январь айына карата өткөн жылдын ушул мезгилине салыштырмалуу цемент өндүрүүнүн көлөмү 20,4%га көбөйгөнү байкалууда.
«Tazabek» басылмасы даярдаган материалда Кыргызстандагы цемент өндүрүүчүлөр жана алардын мамлекеттик бюджетке төккөн суммалары тууралуу маалымат берилет. Былтыр цемент өндүрүүчү ишканалар бюджетке 3 млрд сомдон ашык каражат төлөшкөн.
2024-жылы бюджетке жалпы чегерүүлөрдүн суммасы 3 млрд 9 млн 795 миң 714,19 сомду түзгөн.