АКИpress - Кыргыз Республикасынын Коргоо министринин буйругуна ылайык, 8-апрель аскер комиссариаттарынын кызматчыларынын күнү катары белгилене баштайт. Бул тууралуу Коргоо министрлиги билдирди.
Буга байланыштуу салтанаттуу иш-чара уюштурулуп, анын алкагында өзгөчөлөнгөн кызматчыларга ардак грамота тапшырылып, ыраазычылык жарыяланды.
1918-жылдын 8-апрелинде Эл комиссарлар кеңешинин декрети менен аскер комиссариаттарынын системасы түзүлгөн. Аталган документке ылайык, аскер комиссариаттарына коргонуу тармагындагы маселелерди чечүү милдети жүктөлгөн. Алар Куралдуу күчтөргө жана башка аскердик түзүмдөргө чакыруу жана жөнөтүү үчүн адамдык жана транспорттук ресурстарды даярдоо иштерин жүргүзүшкөн.