АКИpress - Президенттин администрациясынын тапшырмасын аткаруунун алкагында Бишкек мэриясында коммуналдык кызматтарды төлөө үчүн санариптик дүмүрчөктөргө өтүү маселелери боюнча жумушчу топтун жыйыны өттү. Бул тууралуу мэриянын басма сөз кызматы билдирди.
Кеңешме вице-мэр Рамиз Алиевдин төрагалыгы алдында шаардык коммуналдык кызматтардын жетекчилери, ошондой эле Энергетика министрлиги, «Газпром-Кыргызстан» ЖЧКсы, «Түндүк» мамлекеттик мекемеси, «Кыргызстан улуттук электр тармагы» ААКтын жана «Санариптик технологиялар борбору» муниципалдык ишканасынын өкүлдөрүнүн катышуусунда өттү.
Анда кызматтардын маалымат базаларын интеграциялоо, бирдиктүү төлөм документин түзүү, биллинг тутумун өнүктүрүү жана толугу менен санариптик форматка өтүү маселелери талкууланды.
Учурда Бишкекте бирдиктүү дүмүрчөк колдонулат.
«Жыйынтыгында кагаз түрүндөгү дүмүрчөктөрдөн этап-этабы менен баш тартуу жана коммуналдык кызматтар үчүн санариптик дүмүрчөктөрдү киргизүү чечими кабыл алынды», - деп жазылган маалыматта.