АКИpress - Бишкек мэриясы 400 автобустун каттамга чыкпай жаткандыгы тууралуу маалыматты төгүндөдү. Бул тууралуу 31-мартта муниципалитеттин басма сөз кызматы билдирди.
Буга чейин мындай маалыматты уюмдардын бири тараткан, бирок мэрия бул маалымат чындыкка дал келбестигин белгиледи.
«Бишкек шаардык транспорту» муниципалдык ишканасынын маалыматы боюнча, күн сайын каттамга 1250дөн 1300гө чейин автобус чыгууда. Коомдук транспорт штаттык режимде иштеп жатат, ал эми автобустардын бир бөлүгү маршруттарга кезек менен чыгат.
Мэрия учурда автопаркты колдонуу коэффициенти болжол менен 85% түзөрүн кошумчалады.
«Мындан тышкары, 2025-жылдын ноябрь айында сатып алынган 95 жаңы автобусту каттоо иштери жүрүп жатат», - деп билдиришти мэриядан.