АКИpress - АКШ Жакынкы Чыгышка үчүнчү авианосец сокку уруучу тобун жөнөтүп жатат. Бул тууралуу 27-мартта CBS News телеканалы кабарлады.
Алардын маалыматы боюнча, USS George H.W. Bush авианосеци баштаган, 48 истребители бар топ АКШ Куралдуу күчтөрүнүн Борбордук командачылыгына өткөрүлөт жана Иранга каршы операцияга катышат.
Топтун курамына USS Ross, USS Donald Cook жана USS Mason ракеталык эсминецтери кирет, алар Атлантикадагы базаларынан чыгып, Жакынкы Чыгыш аймагына бет алышкан.
Буга чейин USS George H.W. Bush авианосеци баштаган сокку уруучу топ Атлантикадагы машыгууларды аяктап, масштабдуу согуштук операцияларга катышууга даярдыгын ырастаган.
Учурда CENTCOM базасынын жоопкерчилигиндеги аймакта эки авианосец тобу бар: бири USS Abraham Lincoln баштаган Араб деңизинде, экинчиси USS Gerald R. Ford. Акыркысы жакында Кызыл деңиздеги согуштук аракеттер аймагынан чыгып, борттогу өрттөн кийин оңдоо иштери үчүн Крит аралындагы Суда-Бей базасына кетүүгө аргасыз болгон.
USS Gerald R. Ford өткөн жылдын июнь айынан бери узак жолдо жүрүп, аймактагы кызмат өтөө мөөнөтүнөн ашып кеткен. Алгач топ Венесуэлага каршы операциялар үчүн Кариб бассейнине жөнөтүлүп, андан кийин Жакынкы Чыгышка которулган.
Аймакка келе жаткан USS George H.W. Bush USS Gerald R. Fordду топтун курамында алмаштырышы мүмкүн деген божомолдор да бар.