АКИpress - 11-мартта Айгүл Рыскулова Евразия экономикалык комиссиясынын Эмгек миграциясы жана социалдык коргоо департаментинин директору болуп дайындалды. Бул тууралуу ЕЭКтин сайтында маалымдалды.
Рыскулова 1995-жылы Эмгек жана социалдык мамилелер академиясын аяктаган. Эмгек жолун Кыргызстандын сот тутумунда баштап, кийинчерээк Эмгек жана социалдык коргоо министрлигинде жана Социалдык фонддо жетекчилик кызматтарда иштеген. 2005–2010-жылдары эмгек, иш менен камсыз кылуу жана миграция министри болгон. Кийинчерээк президенттин кеңешчиси, мамлекеттик каттоо кызматынын төрайымы, Бишкек шаарынын вице-мэри жана мэрдин милдетин убактылуу аткаруучу болуп иштеген. 2020–2024-жылдары Кыргызстандын ыйгарым укуктуу өкүлү жана Көз карандысыз мамлекеттердин шериктештигинин Экономикалык кеңешине караштуу экономикалык маселелер боюнча комиссиянын төрайымы, Кыргызстандын ыйгарым укуктуу өкүлү кызматын аркалаган.