АКИpress - Кыргызстандын ветеринардык кызматы Чүй облусунда жаныбарлардын кооптуу ооруларынын жайылышы тууралуу жаңылыктарга комментарий берип, калкты дүрбөлөң салбоого чакырды. Эпизоотияга каршы күрөшүү башкармалыгынын башкы адиси Дайыркул Саткынов радио аркылуу берген маегинде, учурда өлкөдө үзгүлтүксүз эмдөө жүргүзүлүп жаткан ылаңдын түрлөрү катталган жок деп билдирди.
«Шарп биздин көзөмөлүбүздөгү негизги оорулардын бири болуп саналат жана ветеринарлар анын жети түрү бар экендигин билишет. А, О жана Азия-1 түрлөрү боюнча өлкөдө абал таза, муну мен толук кепилдик менен айта алам», - деди адис.
Анын айтымында, жаз мезгили салттуу түрдө малдын иммунитетинин төмөндөшү менен коштолот, ошондуктан ооз көңдөйүнүн кадимки сезгенүүлөрү көбүнчө кооптуу инфекция катары жаңылыш кабыл алынат.
Адис, ошондой эле, мамлекеттик деңгээлде диагноз тастыкталган учурда олуттуу кесепеттер болорун белгиледи.
«Эгер шарп расмий түрдө аныкталса, коңшу мамлекеттер — Казакстан, Өзбекстан, Россия, Тажикстан — биздин тирүү малдарыбыз үчүн 3 жылга чек араларын жабышат. Эт жана сүт азыктарын экспорттой албай калабыз, андыктан бул маселе ветеринардык гана эмес, саясий да маселе», - деп кошумчалады мекеменин өкүлү.
Саткынов, ошондой эле, эгерде мал арыктабаса, шарп өзү жаныбарлардын массалык өлүмүнө алып келбестигин түшүндүрдү. Оору шектелген учурда ээлерине дароо жергиликтүү адистерге кайрылуу сунушталды.
«Шарп өзү 3-4 күндө грипп сыяктуу эле өтөт. Эгер коңшуларда шектенүүлөр болсо, убара тартпай — уйларыңыздарды жана музоолоруңузду марганцовка же туз менен сүртүңүздөр, анткени жазында кургак чөптөн улам көбүнчө кадимки стоматит учурлары көбөйөт», - деп жыйынтыктады Дайыркул Саткынов.