АКИpress - Маданият, маалымат жана жаштар саясаты министрлиги «Көчмөн цивилизациялардын мурасы жана Дүйнөлүк көчмөндөр оюндарынын өзгөчө макамы жөнүндө» конституциялык мыйзам долбоорун коомдук талкууга чыгарды.
Бул документ Кыргызстанды көчмөн цивилизациялардын мурасын сактоо жана жайылтуу боюнча борбор катары расмий бекемдөө үчүн керек. Ошондой эле мыйзам Дүйнөлүк көчмөндөр оюндарынын эл аралык маданий-гуманитардык долбоор катары өзгөчө макамын аныктоого багытталган. Азыркы мыйзамдарда бул маселе толук камтылбай, Кыргызстандын бул тармактагы эл аралык ролу так көрсөтүлгөн эмес.
Дүйнөлүк көчмөндөр оюндары Кыргызстан тарабынан 2012-жылы демилгеленип, алгачкы оюндар 2014-жылы өткөн. 2025-жылдын декабрында «World Nomad Games» товардык белгисине болгон укук Кыргызстандын мамлекеттик менчигине өткөрүлгөн.
2026-жылы Ысык-Көлдө VI Дүйнөлүк көчмөндөр оюндары өтөт. Кийинчерээк оюндарды ар 2 жыл сайын түрдүү өлкөлөрдө өткөрүү пландалууда, бирок долбоордун ээси катары укуктук жана уюштуруучулук көзөмөл Кыргызстанда сакталат. Мыйзам долбоору бул оюндарга болгон өзгөчө укукту Кыргызстанга бекитет жана аларды башка өлкөлөрдө өткөрүү укугун эл аралык келишимдер аркылуу берүү тартибин аныктайт.
Көчмөндөр оюндары ЮНЕСКОнун материалдык эмес маданий мурастарды сактоо боюнча мыкты тажрыйбалар тизмесине киргизилген. Анын мааниси БУУнун Башкы Ассамблеясынын жана БУУнун Цивилизациялар альянсынын резолюцияларында да белгиленген.
Бул мыйзам кабыл алынса, түздөн-түз бюджеттик чыгымдарды талап кылбайт деп күтүлүүдө. Ошол эле учурда ал келечекте тармактык мыйзамдарды өнүктүрүүгө, маданий туризмди жана креативдүү экономиканы өнүктүрүүгө укуктук негиз түзөт.