АКИpress - 50 миң доллар талап кылган шектүү кармалды. Бул тууралуу Бишкек шаардык ички иштер башкы башкармалыгынын басма сөз кызматы билдирди.
Биринчи май райондук ички иштер бөлүмүнө З.С. аттуу жаран арыз менен кайрылып, А.И. аттуу адамга карата чара көрүүнү суранган. Алдын ала маалыматтар боюнча, А.И. арыздануучунун жолдошу 2-мартта УКМК кызматкерлери тарабынан кармалганын билип калып, ага каршы арыз жаза турганын айтып коркуткан. Ошондой эле эгер ал арыз жазса, абал андан бетер оорлошо турганын айтып, шантаж кыла баштаган.
Тергөө маалыматына караганда, А.И. арыз жазуудан баш тартуу жана жолдошунун абалына терс таасирин тийгизе турган иш-аракеттерди токтотуу үчүн 50 000 доллар талап кылган.
Бул факт боюнча КР Кылмыш-жаза кодексинин 208-беренеси (Опузалап талап кылуу) менен кылмыш иши козголуп, 1971-жылы туулган А.И. жабырлануучу З.С.дан 30 000 доллар алып жаткан жеринен кармалды.
Шектүү убактылуу кармоочу жайга киргизилди. Учурда тергөө иштери жүрүп жатат.