АКИpress - Мамлекеттик салык кызматы рейддик салыктык көзөмөлдүн жүрүшүндө Ош шаарындагы дарыканалардын биринен мыйзамсыз дары-дармектерди тапты.
Салык кызматынын басма сөз кызматы билдиргендей, «Аптека Кейжи» ЖЧКсына таандык жайды текшерүү учурунда Саламаттыкты сактоо министрлигинин Дары-дармек жана медициналык буюмдар департаментинде катталбаган жана өлкө аймагына мыйзамсыз жол менен алып келинген жалпы суммасы 269 миң 989 сомдук дары-дармек табылды.
Ошондой эле дарыкана дары-дармектерди сактоого жана сатууга уруксат берүүчү документтери жок иштегени аныкталды.
Мындан тышкары, салык органдары башка дагы мыйзам бузууларды аныкташкан. Атап айтканда, товарларды сатуу электрондук эсеп-фактуралар аркылуу чагылдырылбастан жүргүзүлгөн, айрым жалданып иштеген кызматкерлер боюнча салык отчеттору берилген эмес, ошондой эле көзөмөл-кассалык машина техникалык жактан бузук абалда колдонулган.
Салык кызматкерлери жеринде тиешелүү актыларды түзүштү. Топтолгон материалдардын негизинде мыйзам чегинде чаралар көрүлөт.