АКИpress - 9-мартта Тегеранда Ирандын жаңы жогорку лидери — аятолла Можтаба Хаменеинин салтанаттуу ант берүү аземи өттү. Ал бул кызматка атасы Али Хаменеи 28-февралда Израилдин жана АКШнын анын резиденциясына жасаган соккусунан каза болгон соң келди. Иш-чараны ирандык жалпыга маалымдоо каражаттары түз алып көрсөттү.
Тегерандын Энкалаб аянтына он миңдеген адам чогулган. IRIB кабарчысынын маалыматы боюнча, эл аянтка жана ага чектеш көчөлөргө жергиликтүү убакыт боюнча саат 15:00дөн тарта келе баштаган. Жүрүштөр Ирандын башка шаарларында да — Кум, Бабольсер, Жуйбар, Рабат-Карим, Мешхед жана башка жерлерде өттү.
ISNA агенттиги Энкалаб аянтындагы митингден кадрларды жарыялады. Анда адамдар абадан коргонуу каражаттары иштеп жатканда: «Биз күрөшөбүз, биз өлөбүз, бирок кордукту кабыл албайбыз» деген ураандарды чакырып жатышканын көрүүгө болот.
АКШ менен Израилдин Ислам Республикасына каршы биргелешкен операциясынын алгачкы күнүндө Ирандын жогорку лидери Али Хаменеи өлтүрүлгөн. 9-мартта түнү 56 жаштагы Можтаба Хаменеи жаңы жогорку лидер болуп шайланганы белгилүү болду.
Моджтаба Хаменеи — шиит дин кызматкери. «The New York Times» гезитинин жазганына караганда, ал Ислам революциясынын сакчылар корпусу (ИРСК) менен тыгыз байланышта экени белгилүү. Басылманын булактары билдиргендей, Али Хаменеи каза болгондон кийин ИРСК анын уулун дайындоону талап кылган.