АКИpress - 4-июлда Кыргыз мамлекеттик медициналык академиясында "Балдар травматологиясы жана ортопедиясынын актуалдуу маселелери" аттуу илимий-практикалык конференция өтүүдө.
Иш-чара Кыргызстандагы балдар ортопедиясынын негиздөөчүсү Касымбек Тазабековдун 90 жылдыгына арналган.
Конференцияга дүйнөнүн булуң-бурчунан келген алдыңкы травматологдор жана ортопеддер чогулду. Бишкекке АКШ, Кытай, Россия, Казакстан, Өзбекстан жана башка өлкөлөрдүн адистери келишти. Катышуучулардын арасында Россия Илимдер академиясынын академиги Николай Загородний да бар.
Ал балдар травматологиясы жана ортопедиясы маселелерине ар дайым чоң маани берилип келгенин белгиледи.
"Эмне үчүн бул маанилүү? Себеби биз сергек муунду тарбиялап, өстүрүшүбүз керек. Бүгүнкү күндө дарылоонун жаңы хирургиялык жана консервативдик ыкмалары пайда болууда. Бул ыкмалар балдарды бутуна тургузууга, аларга толук кандуу жашоо тартуулоого жана коомдун активдүү мүчөлөрүнө айлантууга жардам берет", - деди ал.
Загородний таяныч-кыймыл аппаратынын патологиялары бар балдар көп учурда социалдык обочолонууга дуушар болорун белгиледи.
"Мен мындай балдардын четке кагылган учурларын билем. Биз аларга жардам бере алабыз жана беришибиз керек. Ал эми бүгүнкү конференция биздин кичинекей бейтаптарга жардам берүү үчүн жаңы мүмкүнчүлүктөрдү ачууда", - деди ал.
Загородний Россияда роботтоштурулган технологияларды колдонуу жөнүндө айтып берди.
"Биздин бөлүмдө эки хирургиялык робот иштейт. Биз күн сайын алардын жардамы менен 3-4 операция жасайбыз. Робот операциянын этаптарын так жана туура аткарууга жардам берет. Бул робот хирургду алмаштырат дегенди билдирбейт — чечим ар дайым адамда калат. Робот болгону ишенимдүү жардамчы", - деди ал.