АКИpress - Кыргызстанда жумушсуз кош бойлуу аялдар, эгерде жумуш менен камсыздоо органдарында катталса, төрөткө чейинки жөлөк пул ала алышат. Бул тууралуу Эмгек, социалдык камсыздоо жана миграция министрлигинин өкүлү 24-апрелде «Ишеним» депутаттык тобунун отурумунда билдирди.
Депутат Нуржамал Торобекова учурда төрөткө чейинки бир жолку жардам иштеген жана айыл чарба тармагында эмгектенген аялдарга гана берилип жатканын, ал эми жумушсуздарга бул чара колдонулбай келерин айтты.
Эмгек министрлигинин өкүлү түшүндүргөндөй, иштеген аялдар үчүн кош бойлуулукка жана төрөткө байланыштуу төлөмдөр (эмгек өргүүсү) төмөнкүдөй каржыланат: алгачкы 10 күндү иш берүүчү төлөйт, 11-күндөн баштап төлөмдөр республикалык бюджеттин эсебинен жүргүзүлөт. Эгерде жумушу жок кош бойлуу аялдар катталган болсо, орто эсеп менен 7500 сомго жакын акчалай жөлөк пул ала алышат.
Министрликтин өкүлү тактагандай, бул үчүн жумуш менен камсыздоо борборуна катталуу керек жана аялдар эмгек стажы жок эле төлөм алуу укугуна ээ боло алышат.