АКИpress - Министрлер кабинетинин төрагасы Адылбек Касымалиев Моңголиянын Кыргызстандагы элчиси Содном Ганхуягды дипломатиялык миссиясынын аяктагандыгына байланыштуу кабыл алды. Бул тууралуу Министрлер кабинетинин басма сөз кызматы билдирди.
Жолугушуунун жүрүшүндө акыркы жылдары эки өлкөнүн достук жана кызматташтык мамилелеринин активдүү өнүгүшү белгиленди. Кыргызстан менен Моңголиянын мамлекет башчыларынын сапарлары башкы окуялар болду. Моңголиянын премьер-министринин Кыргызстанга расмий сапары, ошондой эле өкмөттүк деңгээлде соода-экономикалык, илимий-техникалык жана маданий-гуманитардык кызматташтык боюнча кыргыз-моңгол өкмөттөр аралык комиссиясынын бир катар жыйындары өткөрүлдү.
Минкаб башчысы Адылбек Касымалиев үстүбүздөгү жылдын сентябрь айында Кыргызстанда VI Дүйнөлүк көчмөндөр оюндары өтөрүн эске салып, Моңголиянын делегациясы аларга салттуу түрдө активдүү катышып, оюндарга элдердин тарыхый биримдигинин жана маданий байлыгынын өзгөчө атмосферасын тартуулайт деген ишенимин билдирди.
Өз кезегинде Содном Ганхуяг моңгол тараптын эки тараптуу мамилелерди мындан ары да чыңдоого жана ырааттуу өнүктүрүүгө, ошондой эле соода-экономикалык жана маданий-гуманитардык чөйрөлөрдөгү биргелешкен долбоорлорду ишке ашырууга даяр экендигин ырастады.