АКИpress - АКШнын Каржы министрлиги Иранга карата санкцияларды жаңылады. Чет элдик активдерди көзөмөлдөө башкармалыгы тизмеге 14 жаңы позицияны кошту. Чектөөлөр Иран, Түркия жана Бириккен Араб Эмираттарындагы жеке адамдарга жана компанияларга киргизилди.
Жаңыланган тизмеге ирандык «Mahan Air» авиакомпаниясы менен байланышкан бир нече адам жана «Boeing 777-200ER» үлгүсүндөгү эки учак да киргизилди. Буга чейин АКШ бул компанияны Ислам революциясынын сакчылар корпусу менен байланышы үчүн санкциялык тизмеге киргизген.
21-апрель күнү кечинде Иран АКШга Исламабадда өтө турган сүйлөшүүгө катышпай турганын билдирген. Андан кийин АКШнын президенти Дональд Трамп Иран менен ок атышууну токтотуу режими узартылганын айткан. Ошол эле учурда Ирандын мамлекеттик «IRIB» телеканалы Тегеран бул чечимди тааныбай турганын жана өз каалоосуна жараша аракет кылуу укугун сактап каларын билдирген.