АКИpress - Бүгүн, 11-апрелде президент Садыр Жапаров Ош облусуна болгон иш сапарынын алкагында Араван районуна барды.
Араван районунун акими Данияр Эркимбаев президентке социалдык чөйрөнү жана инфраструктураны жакшыртуу боюнча аткарылган иштер тууралуу маалымат берип, ошондой эле мындан аркы өнүгүү перспективалары жөнүндө айтып берди.
Президенттин басма сөз кызматы билдиргендей, 2021-жылдан 2025-жылга чейинки мезгилде райондо бир катар багыттар боюнча, анын ичинде жол курулушунда көрүнүктүү натыйжаларга жетишилди. Жалпысынан жол инфраструктурасына 954 млн сом багытталган, бул 105 чакырым жолго асфальт төшөөгө мүмкүндүк берди.
Социалдык тармакта 50дөн ашык объект пайдаланууга берилди. Өндүрүлгөн продукциянын көлөмү бир жарым эседен ашык көбөйүп, жүздөгөн жаңы ишканалар ачылып, бир нече миң жумушчу орундары түзүлдү.
Керме-Тоодо заманбап индустриалдык борбор куруу пландалууда. Бул жерде инвестиция тартуу жана жүздөгөн жаңы жумушчу орундарын түзүү менен он өнөр жай объектиси курулат.
Энергетика тармагындагы келечектүү долбоорлор да тааныштырылды. Араван-Сай дарыясына суу сактагыч куруу боюнча сунушка көңүл бурулду. Бул долбоорду ишке ашыруу сугат суунун жетишсиздигин кыйла азайтууга, миңдеген гектар жаңы жерлерди өздөштүрүүгө, айыл чарба өндүрүшүнүн көлөмүн бир топ көбөйтүүгө жана туризмди жана эс алуу зоналарын өнүктүрүү үчүн жагымдуу шарттарды түзүүгө мүмкүндүк берет.
Райондун тургундарынын турак жай маселесин чечүү үчүн Мамлекеттик ипотекалык компания С. Юсупов атындагы айыл аймагынан 11 гектар жер тилкесин сунуштады. Бул кезекте турган 18 миңден ашык жаранды турак жай менен камсыз кылууга мүмкүндүк берет.
Мындан тышкары, райондун инфраструктурасын жакшыртуу үчүн спорттук комплекс, райондук оорукананын кошумча корпусу жана Араван районунун мамлекеттик администрациясынын жаңы имаратын куруу сунушталды.
Презентацияны уккан соң Садыр Жапаров мамлекет Кыргызстандын аймактарын комплекстүү жана туруктуу өнүктүрүүгө артыкчылыктуу көңүл бурарын белгиледи.
Мамлекет башчысы сунушталган демилгелерди ишке ашыруу Араван районун социалдык-экономикалык жактан жаңы деңгээлге чыгарууга, кошумча жумуш орундарын түзүүгө жана калктын жашоо сапатын жакшыртууга мүмкүндүк берерин айтты.