АКИpress - 9-апрелде Бишкекте калдыктарды башкаруу жаатында бирдиктүү саясатты түзүү жана Кыргыз Республикасынын туюк циклдеги экономикага өтүүсүнө арналган тегерек стол өттү. Бул тууралуу Жаратылыш ресурстары, экология жана техникалык көзөмөл министрлигинин басма сөз кызматы билдирди.
Маалыматка ылайык, иш-чарага министрликтин, «Helvetas Swiss» эл аралык уюмунун, «Эко-Оператор» мамлекеттик ишканасынын өкүлдөрү, ошондой эле өлкөнүн кайра иштетүүчү ишканаларынын жетекчилери катышты.
Тагыраак айтканда, талкуунун темасы 2025-жылдын июнь айында өндүрүүчүлөрдүн кеңейтилген милдеттенмесинин тутумун башкаруу үчүн түзүлгөн «Эко-Оператор» мамлекеттик ишканасынын ишмердүүлүгү болду. Бул механизмге ылайык, өндүрүүчүлөр жана импорттоочулар буюмдары колдонуудан чыккандан кийин аларды утилизациялоого жооптуу.
2026-жылдын 1-апрелине карата утилизациялык төлөмдөн түшкөн каражат 150 млн сомду түздү. Инфратүзүмдү өнүктүрүүнүн алкагында калдыктарды кайра иштетүү, сорттоо жана утилизациялоо менен алектенген 130 субъекттин тизмеси түзүлгөн.
«Өндүрүүчүлөрдүн кеңейтилген жоопкерчилигин киргизүү таштанды полигондорунун санын кыскартууга жана калдыктарды кайрадан чарбалык жүгүртүүгө тартууга багытталган. Утилизациялык жыйымдан түшкөн каражаттар кайра иштетүү кубаттуулуктарын модернизациялоо долбоорлорун каржылоого жана өлкөнүн экологиялык инфраструктурасын өнүктүрүүгө жумшалат», - деп айтылат билдирүүдө.
Маалымат үчүн:
Бүгүнкү күндө утилизациялык төлөм Министрлер кабинетинин чечими менен белгиленген товарларга карата төлөнөт. Ага төмөнкүлөр кирген:
- аккумуляторлор (анын ичинде коргошундуу жана электромобилдер үчүн);
- автоунаалар;
- тиричилик техникасы;
- унаа чыпкалары;
- желим буюмдар;
- майлоочу майлар;
- картон, резина, полимер ж.б. аралаш материалдардан жасалган таңгактар.
- электроника.