АКИpress - Талас шаарындагы медициналык колледжде 1,5 млн сомго жакын ишенип берилген мүлктү ысырап кылуу фактысы аныкталды. Бул тууралуу Улуттук коопсуздук мамлекеттик комитети (УКМК) билдирди.
Комитеттин маалыматына караганда, мамлекеттик мекемеге жасалма түрдө жумушка орноштуруу фактысы аныкталган. Тактап айтканда, 2012-жылдан баштап 2026-жылдын мартына чейин Талас облусунун тургуну П.Е.Т. Талас медициналык колледжине жумушка кабыл алынган, бирок ишке киргенден бери өзүнүн кызматтык милдеттерин аткарган эмес. Буга карабастан, аталган мезгил ичинде иш убактысын эсепке алуунун жасалма толтурулган табелдеринин негизинде ага үзгүлтүксүз эмгек акы төлөнүп келген.
Бул факт боюнча Кылмыш-жаза кодексинин 210-беренеси (Ишенип берилген мүлктү ысырап кылуу же ишенип берилген мүлктү ээлеп алуу) боюнча кылмыш иши козголду.
Аудитордук текшерүүнүн жыйынтыгында, мамлекеттин кызыкчылыгына келтирилген алдын ала зыян 1 млн 492 миң 335 сомду түздү.
Тергөө жүрүп жатат.