АКИpress - Министрлер Кабинетинин төрагасы Адылбек Касымалиев президенттин мамлекеттик башкаруу системасынын натыйжалуулугун жогорулатууга жана бюрократиядан арылтууга багытталган жарлыгынын аткарылышына мониторинг жүргүзүү боюнча ведомстволор аралык комиссиянын жыйынын өткөрдү.
Минкаб башчысы ашыкча жөнгө салууну жана бюрократиялык жол-жоболорду жоюу боюнча мурда кабыл алынган чаралар билим берүү, илим, саламаттыкты сактоо, социалдык камсыздоо, мамлекеттик жана муниципалдык кызмат, аткаруу өндүрүшү, статистика, каржы сектору жана мамлекеттин ишмердүүлүгүнүн башка багыттарына тиешелүү болгонун белгиледи. Анын айтымында, башкаруу процесстерин жана ведомстволор аралык өз ара аракеттенүүнү санариптештирүү, ченемдик жөнгө салууну өркүндөтүү, ошондой эле айрым чөйрөлөрдөгү мамлекеттик монополияны жоюу жүргүзүлүп жаткан иштин маанилүү куралдары болуп калды.
Адылбек Касымалиев мамлекеттик башкаруунун бардык деңгээлдеринде жарандар жана бизнес үчүн административдик тоскоолдуктарды азайтуу боюнча ишти улантуу жана реформаларды жүргүзүүнү активдештирүү зарылдыгын белгиледи.
Жыйындын жүрүшүндө ведомстволор аралык комиссиянын мурда берилген тапшырмаларынын аткарылышынын маселелери каралды. Талкуунун жыйынтыгында комиссия тарабынан административдик тоскоолдуктарды андан ары азайтууга жана мамлекеттик процесстерди санариптештирүүгө багытталган бир катар чечимдер кабыл алынды.
Атап айтканда, жер тилкелерин бөлүү жана трансформациялоо процесстерин жакшыртуу боюнча; айыл чарба жаныбарларын бирдиктүү мамлекеттик реестрге маалыматтарды киргизүү менен санариптик каттоо ишин күчөтүү жана кагаз түрүндөгү маалым каттардан баш тартуу боюнча; экологиялык паспортторду алууну жөнөкөйлөтүү, анын ичинде процедураларды электрондук форматка өткөрүү боюнча; туризм жана коомдук тамактануу чөйрөлөрүндөгү процедураларды санариптештирүү жана жөнөкөйлөтүү боюнча сунуштарды иштеп чыгуу боюнча тапшырмалар берилди.
Мындан тышкары мамлекеттик ресурстарды пайдалануунун натыйжалуулугун жогорулатуу жана электр энергиясын үнөмдүү керектөө боюнча тапшырмалар берилди, кадр саясатынын айрым маселелери, автотранспорт каражаттарын алып келүү жана каттоо жана башка бир катар маселелер каралды. Кабыл алынган чечимдерди ишке ашыруу бюрократиялык процедураларды андан ары кыскартууга, мамлекеттик органдардын ишинин ачыктыгын жогорулатууга жана жарандар менен бизнестин шарттарын жакшыртууга багытталган.