АКИpress - Чет мамлекеттердин укук коргоо органдары тарабынан эл аралык издөөгө жарыяланган адамдар кармалды, деп маалымдады ИИМдин басма сөз кызматы.
Сербиянын Белград шаарында 1992-жылы туулган С.Д.А. аттуу жаран кармалды. Ал укук коргоо органдары тарабынан КРнын Кылмыш-жаза кодексинин 205-беренесинин 2-бөлүгүнүн 4-пунктунда (уурулук) көрсөтүлгөн кылмышты жасагандыгы үчүн издөөгө алынган. Шектүү Манас шаарында жайгашкан үйдүн короосуна кирип, планшет, кутунун ичиндеги ири суммадагы акчаны, мамлекеттик жана ведомстволук сыйлыктарды да уурдап кеткен. Кылмыш жасалгандан кийин шектүү окуя болгон жерден качкан.
Мындан тышкары, Испаниянын Мадрид шаарында эл аралык издөөдө жүргөн 1985-жылы туулган Ю.А.С. жана 1980-жылы туулган Ю.П.В. аттуу жарандар кармалды. Алар КРнын Кылмыш-жаза кодексинин 209-беренесинин 4-бөлүгүндө (алдамчылык) көрсөтүлгөн кылмышты жасагандыгы үчүн эл аралык издөөгө жарыяланган.
Тергөөнүн маалыматы боюнча, алар жүк ташуучу унааларды сатып алуу жана андан ары жүк ташуу бизнесин жүргүзүү шылтоосу менен ишенимге кирип, алдамчылык жолу менен ири суммадагы акча каражатын ээлеп алышкан. Кийинчерээк өздөрүнө алган милдеттенмелерди аткарбастан, сатып алынган унааларды сатып жиберип, түшкөн каражатты жеке максаттарына жумшашкан.
Учурда ыйгарымдуу органдар тарабынан аларды мыйзамга ылайык кылмыш жоопкерчилигине тартуу максатында Кыргызстанга экстрадициялоо маселеси каралууда.