АКИpress - Израилде Иран менен согушуу шартында ракета жана учкучсуз аппараттар менен келтирилген зыян үчүн компенсация алууга 12 миң 845 арыз берилгенин «Maariv» маалымат каражаты билдирди.
Бул маалымат 2026-жылдын 1-мартынан 25-мартына чейинки мезгилди камтыйт.
«The Jerusalem Post» жазгандай, 8726 арыз имараттардын жабыркашына, 1324ү башка мүлккө жана жабдууларга келтирилген зыянга, 2552си унаалардын талкаланышына, ал эми 243ү башка зыяндарга тиешелүү.
Ачык булактардын маалыматы боюнча, Иран Израилге каршы «Fateh-110» жана «Zolfaghar» орто жана кыска аралыкка учуучу ракеталарды, ошондой эле «Sejjil» жана «Emad» сыяктуу алыска учуучу куралдарды колдонот. Ошондой эле катуу отундуу «Kheibar Shekan» ракетасы да колдонулганы кабарланган.
Арыздар аймактар боюнча төмөнкүдөй бөлүштүрүлгөн: 6543ү Тель-Авивде, 4371и Ашкелондо, 1221и Аккодо, 61и Тверияда, 313ү Иерусалимде жана 36сы Эйлатта.
Израилде катаал аскердик цензура иштейт, буга байланыштуу чабуулдардын кесепеттери, анын ичинде жоготуулар жана стратегиялык объекттердин бузулушу тууралуу маалыматтарды жарыялоо чектелет.
Institute for the Study of War жана International Institute for Strategic Studies сыяктуу бир катар аналитикалык борборлордун баамына ылайык, интенсивдүү ракеталык чабуулдар Израилдин ракетага каршы коргонуу системасына олуттуу жүк келтирүүдө. Эксперттер узакка созулган конфликт учурунда, айрыкча Iron Dome жана Arrow системаларына керектүү каражаттар тартыш болушу мүмкүн экенин, себеби аларды өндүрүү убакытты талап кыларын белгилешет.