АКИpress - Транспорт жана коммуникациялар министрлигине караштуу «Барскоон–Бедел автомобиль жолун куруу боюнча мамлекеттик дирекция» мекемеси түзүлдү.
Жаңы түзүлгөн дирекция Барскоон–Бедел жолун куруу долбоорун ишке ашырууну уюштуруучу жана координациялоочу ыйгарым укуктуу мамлекеттик орган болуп саналат.
Министрлер кабинетинин төрагасы А.Касымалиевдин тескемесине ылайык, башкы директор кызмат ордуна Акылбек Мусабаев дайындалды.
Барскоон–Бедел унаа жолунун жалпы узундугу болжол менен 150 чакырымды түзөт. Ал Ысык-Көл облусунун Барскоон айылын Кытай менен чектешкен «Бедел» көзөмөл-өткөрмө пункту менен байланыштырган стратегиялык маанилүү коридор болуп калат. Долбоордун алкагында 2 тоннель, 30дан ашык көпүрө жана коргоочу инженердик курулмалар каралган.
Курулуш иштери 2025-жылдын 26-агустунда башталган. Долбоорду ишке ашыруу мөөнөтү 5 жылды түзөт. Планга ылайык, негизги курулуш иштери 2029-жылы аяктап, 2030-жылы жол толук пайдаланууга берүү мерчемделген.