АКИpress - 4–5-апрелде катуу жааган жамгырдан кийин Дагестанды экинчи жолу сел каптады.
Алдын ала маалымат боюнча эки адам каза тапты. Махачкала, Дербент жана Дагестан жарыктары шаарларын суу каптады. Айрым райондордо суу үйлөргө кирип, жолдорду каптады, кээ бир курулуштар жабыркады. Куткаруучулар кооптуу аймактардан тургундарды эвакуациялап жатышат.
ӨКМдин маалыматына караганда, 5-апрелдин таңына карата 6 калктуу конушта 973 турак үй, 967 короо-жай жана 42 жол тилкеси суу алдында калган. Дарыялар ташып, 139 калктуу конуш жарыксыз калды. Ал эми таш кулагандыктан 53 айылга барчу жол жабылды.
Транспорт каттамында да үзгүлтүк болуп, поезддер кечигүүдө. Дербент районунда Гежух суу сактагычынын топурактан жасалган тосмосу жарылган. Алдын ала маалымат боюнча, Мамедкала айылында 28 үйдү суу каптап, 100 адам эвакуацияланган. Ошол эле айылдагы Михайловка кичи районунда көчөлөрдү суу каптоодо. Гежух айылынын жанында да федералдык трассаны суу жууду, агын суу бир нече унааны агызып кеткен. Селден улам ичүүчү суунун сапаты да начарлады.
Карабудахкентте 25 киши, анын ичинде 14 бала, ичеги-карын инфекциясынын белгилери менен ооруканага түшкөн. Каспий шаарында 30дан ашуун адам дарыгерлерге кайрылган. Алдын ала маалымат боюнча, буга кайнатылбаган сууну ичүү себеп болгон.
Бийлик өзгөчө кырдаал режимин киргизип, убактылуу жайгаштыруу пункттарын ачты жана чыгымдарды компенсациялоо боюнча арыздарды кабыл ала баштады. Мындан тышкары, аймакта А гепатитине каршы шашылыш эмдөө башталды. Алдын ала эсеп боюнча, жабыркаган аймактардагы турак жайларды калыбына келтирүүгө 4 млрд рублдан ашык каражат талап кылынат.