АКИpress - АКШнын президенти Дональд Трамп Иран Ормуз кысыгын ачпаса, өлкөнүн электр станцияларына жана көпүрөлөрүнө сокку уруларын айтып коркутту. Бул тууралуу ал «Truth Social» социалдык тармактагы баракчасына жазды.
Ошондой эле Трамп Иран менен келишим түзүүгө үмүт бар экенин, бирок сүйлөшүүлөр ийгиликсиз болсо, катуу чараларга барарын билдирди.
Буга жооп катары Иран парламентинин төрагасы Мохаммад Багер Галибаф мындай коркутуулар Жакынкы Чыгыштагы кырдаалды дагы да курчутушу мүмкүн экенин айтты. Анын айтымында, бүтүндөй аймак чыңалууда калышы ыктымал.
Буга чейин да Трамп Иранга ультиматум коюп, кыска мөөнөттө кысыкты ачууну талап кылган. Ошол эле учурда ал келишимге жетишүү мүмкүнчүлүгү дагы эле бар экенин ачык айткан. «The Wall Street Journal» басылмасынын маалыматына караганда, Пакистандын ортомчулугу менен тынчтык келишимине жетишүү аракети натыйжа берген эмес.
Маалыматта айтылгандай, Иран сунушталган шарттарды кабыл албай, Исламабадда америкалык тарап менен жолугушуудан баш тарткан.
Ормуз кысыгы дүйнөлүк мунай рыногу үчүн эң маанилүү жолдордун бири бойдон калууда. Азыркы согушка чейин андан деңиз аркылуу ташылган мунайдын чоң бөлүгү өтүп турган. Ошондуктан кысыктын айланасындагы жаңжал бааларга жана аймактагы абалга олуттуу таасир этүүдө.