АКИpress - 48 жаштагы Роберто Маццарелла Виетри-суль-Маре шаарында кармалды. Ал — Маццарелла кланынын башчысы жана Италияда көптөн бери издөөдөгү кылмышкерлердин бири.
«Corriere Del Mezzogiorno» басылмасынын маалыматына ылайык, ал үй-бүлөсү жана эки баласы менен январь айынын аягынан бери ошол жерде жашынып жүргөн. Кармалып жатканда эч кандай каршылык көрсөткөн эмес.
Маццарелла жашап жаткан вилланы тинтүү учурунда кымбат баалуу сааттар, болжол менен 20 миң евро накталай акча, жасалма документтер жана кландын ишмердүүлүгүнө тиешелүү материалдар табылган.
Маццарелла кланы неаполитандык мафия Каморранын курамына кирет жана ондогон жылдар бою Неаполдо контрабанданы жана баңгизат сатууну көзөмөлдөп, Секондильяно кланы менен атаандашып келген. Роберто Маццарелла киши өлтүрүүгө айыпталып, бир жылдан ашык убакыттан бери издөөдө болгон.