АКИpress - Крымда Ан-26 учагы кулап, экипаждын 6 мүчөсү жана 23 жүргүнчү каза болгон, деп жазды «РИА Новости» Россиянын Коргоо министрлигине шилтеме берип.
«Издөө-куткаруу тобу Ан-26 учагынын кыйраган жерин табышты. Жеринен алынган маалыматка ылайык, экипаждын алты мүчөсү жана борттогу 23 жүргүнчү каза болду», - деп айтылат билдирүүдө.
Кырсыктын себеби катары – техникалык мүчүлүштүк айтылууда. Коргоо министрлигинин комиссиясы кырсык болгон жерде иштеп жатат.
Ан-26 аскердик-ташуучу учагы менен байланыш кечээ кечинде үзүлгөн. Учак Крымдын үстүнөн пландалган учууну аткарып жаткан. Басылма учак аскага урунгандыгын билдирди.