АКИpress - Израилдин парламенти террорчулук үчүн соттолгондорго өлүм жазасын киргизген мыйзамды кабыл алды. Мыйзамды үчүнчү окууда 62 депутат колдоп, 48и каршы чыккан.
Мыйзам долбоорун улуттук коопсуздук министри Итамар Бен-Гвирдин ультраоңчул «Оцма Йехудит» партиясы иштеп чыккан. Израилдин премьер-министри Биньямин Нетаньяху бул демилгени колдоду. Парламентте бул маселе боюнча талкуу 12 саатка созулду.
Мыйзамга ылайык, адамды атайлап өлтүргөн террорчу өлүм жазасына тартылат, деп билдирет «The Jerusalem Post». Жазаны аткаруу соттун өкүмү чыккандан кийин 90 күндүн ичинде асуу жолу менен ишке ашырылат.
Чечим кабыл алууда өлүм жазасы менен өмүр бою эркинен ажыратуу жазаларын тандоо укугу каралган (документтин биринчи вариантында өлүм жазасы гана болгон). Ошол эле учурда Батыш жээктин тургундары үчүн аскердик сот тарабынан террорчулук үчүн соттолсо өлүм жазасы гана берилет.
«The Times of Israel» билдиргендей, мыйзам палестиналыктарга гана иштейт, анткени мыйзамга Израилдин жарандары же резиденттери кирбейт.
Мыйзамда Израилдин жарандарын да өлүм жазасына тартуу жобосу каралган, бирок өлүм жазасын Израил мамлекетин четке кагуу максатында адам өлтүргөндөр гана алышат. «The Times of Israel» маалымат каражатынын пикири боюнча, бул аныктама израилдиктер үчүн өлүм жазасын жокко чыгарат.
Депутат Гилад Карив мыйзамга каршы Жогорку сотко арыз менен кайрыларын билдирди.