АКИpress - Россиянын бийлиги апрель айынын башынан тарта бензинди өлкөдөн чыгарууга кайрадан чектөө киргизиши мүмкүн. Бул маселе 27-мартта вице-премьер Александр Новак өткөргөн жыйында талкууланды.
Мындай чарага март айында күйүүчү майдын кымбатташы себеп болууда. Биржада бензин 16%га, дизель майы 22%га кымбаттады. Май куюучу жайлардагы баалар да өсүп, дээрлик инфляциянын деңгээлине жетти.
ЖМКлардын маалыматына караганда, ички рынокту күйүүчү май менен камсыз кылуу үчүн бийлик түрдүү чараларды карап жатат. Алардын ичинде бензин экспортун трейдерлерге да, мунай иштетүүчү заводдорго да толук тыюу салуу маселеси бар.
Буга чейин ушундай толук тыюу салуу 2025-жылдын 31-августунан 2026-жылдын 1-февралына чейин күчүндө болгон. Кийин ал алынгандан соң экспорт кайра жанданып, бирок мартта баалар кайра өсө баштады.
Эксперттердин пикиринде, толук тыюу баанын мындан ары өсүшүн жайлатышы мүмкүн, бирок май куюучу жайларда бензиндин баасы кескин арзандайт деп күтүүгө болбойт. Адистер мындай чара убактылуу гана жардам берерин, бирок тармактагы негизги көйгөйлөрдү чечпей турганын белгилешет.
Рынок туруктуу болушу үчүн мунай иштетүүчү заводдорду модернизациялоо, мунайды тереңирээк иштетүү жана тармак үчүн түшүнүктүү салык шарттарын түзүү керек. Башкача айтканда, бул тыюу баанын кескин өсүшүн кармап калышы мүмкүн, бирок маселени толук чечпейт.