АКИpress - Конфликт башталгандан бери АКШ Ирандын ракета арсеналынын үчтөн бир бөлүгүн жок кылууга жетишти. Бул тууралуу «Reuters» агенттиги чалгындоо маалыматтары менен тааныш булактарга шилтеме кылып кабарлады.
Агенттиктин маалыматына караганда, дагы үчтөн бир бөлүккө жакын ирандык ракеталардын тагдыры белгисиз – алар аба соккуларынан кийин бузулушу, жок болушу же бункерлердин жана өтмөктөрдүн урандылары алдында калышы мүмкүн. Булактардын бири АКШ жана Израилдин соккулары менен Тегерандын колунда болгон учкучсуз учактардын үчтөн бир бөлүгүнө чейин жок кылынганын белгиледи.
Ошол эле учурда Иран дагы деле колдонууга жарактуу ракеталардын олуттуу запасын сактап турганы айтылды. Мындан тышкары, согуш аракеттери аяктагандан кийин бузулган же жашырылган куралдардын бир бөлүгү калыбына келтирилиши мүмкүн.
Буга чейин Израил тарап Тегеран алардын аймагына жете турган болжол менен 2500 баллистикалык ракетага ээ болушу мүмкүн деп билдирген.