АКИpress - Армениянын премьер-министри Никол Пашинян Еревандын метросунда Тоолуу Карабакты Азербайжанга өткөрүп берди деп айыптаган жүргүнчү аял менен уруша кетти.
Күбөлөрдүн айтымында, сүйлөшүү аялдын Пашинянды Карабакты жоготконуна күнөөлөгөнүнөн башталган. Ал буга жооп катары Армения өкмөтү адамдардын Карабакта жашап калуусу үчүн миллиарддаган каражат коротконун айтып, эмне үчүн аял ал жерде калбаганын сураган.
«Биз силердин Карабакта жашашыңар үчүн баарын жасадык, ал эми 2023-жылы адамдар Карабактан Арменияга кетпесин деп чек араны жаап салдыңар деп дал силер мени айыптагансыңар. Эми бул жакка келип алып, "ой, биз кайтып баргыбыз келет" деп жатасыңар», - деп жазган Пашиняндын сөздөрүн «News.am» басылмасы.
Аял премьер-министрден үнүн көтөрбөөнү жана ага сөөмөйүн кезебөөнү суранган, буга ал: «Мен катуураак сүйлөйм, болгон окуяга мени күнөөлөөнүн кереги жок», - деп жооп берген. Пашинян ошондой эле маектешинен колундагы Армениянын картасы тууралуу мындай жек көрүү менен сүйлөбөөнү өтүнгөн.
Бир аз убакыттан кийин Пашинян ал аялдан кечирим сурады. Ал өзүнүн Телеграм каналына видео жарыялап, анда Карабак темасындагы сүйлөшүүдө бул учурду жеңе албай жана эмоциясын кармай албай калганын айтып, муну чоң кемчилик деп атаган.
«Карабактан келген аялдан жана анын баласынан кечирим сурайм жана жаңы жолугушууга чакырам», - деп жазган ал.
Пашинянга жүргүнчүнүн аты Армине Мосиян экенин билдиришкенден кийин, ал ага атынан кайрылып, дагы бир жолу жолугуп, жай отуруп сүйлөшүүгө мүмкүнчүлүк болот деген үмүтүн билдирген.
«Мен бул сүйлөшүүнүн болушун каалайт элем. Сиз баш тартып, артымдан бир нече одоно сөздөрдү айтарыңызды билем. Мен муну моюн сунуу менен кабыл алам, эмоциясыз жай отуруп сүйлөшкүңүз келсе, мен сиздин кызматыңызда экенимди жана алдын ала чакырууңузду кабыл аларымды билип коюңуз», - деди ал.
Армения 2023-жылдын сентябрындагы Азербайжандын аскердик операциясынын натыйжасында Тоолуу Карабакка болгон көзөмөлүн жоготкон. 100 миңден ашуун армяндар Карабакты таштап чыгып кетишкен, ал эми таанылбаган республика 2024-жылдын 1-январынан тарта ишин токтоткон. Кийинчерээк тараптар тынчтык келишимин макулдашышкан, бирок ага кол коюудан мурун Азербайжан Армениянын конституциясын өзгөртүүнү талап кылууда.