АКИpress - Министрлер кабинети «Кыргызгеология» мамлекеттик ишканасына Баткен облусунун Баткен районундагы Алтын-Жылга алтын кенин иштетүү жана Алтын-Жылга аянтында геологиялык чалгындоо иштерин жүргүзүү укугун берди.
2022-жылдын 16-февралындагы №68-т тескемесине ылайык, 2026-жылдын 5-мартындагы №133-т редакциясы менен, ишканага аянты 23,5 га болгон «Алтын-Жылга» кенин иштетүү укугу берилген.
Мындан тышкары, «Кыргызгеология» аянты 48,95 чарчы чакырым же 4895,2 га болгон Алтын-Жылга аймагында геологиялык чалгындоо иштерин жүргүзүү укугуна ээ болду.
Документте белгиленгендей, «Кыргызгеология» Жаратылыш ресурстары, экология жана техникалык көзөмөл министрлигине караштуу Геология жана жер казынасын пайдалануу департаментинин алдында турат жана 100 пайыз мамлекеттик катышуу үлүшүнө ээ.
Жаратылыш ресурстары, экология жана техникалык көзөмөл министрлигине мыйзамда белгиленген тартипте көрсөтүлгөн жер алдындагы объекттерге лицензия берүү тапшырылды.
Тескеменин аткарылышын көзөмөлдөө Президенттик администрациянын президенттин жана Министрлер кабинетинин чечимдерин аткарууну контролдоо башкармалыгына жүктөлдү.
Маселе тууралуу
2014-жылы Мамлекеттик геология жана минералдык ресурстар агенттигинин жер казынасын пайдалануу лицензиялоо боюнча лицензиялык комиссиясы «Баткен Майнинг Компани» ЖЧКсынын 23.05.02-жылдан 04.10.15-жылга чейинки мезгилге берилген Аи-121-02 лицензиясын, алтынды чалгындоо боюнча Алтын-Жылга кенинде (Баткен облусу, Баткен району) жокко чыгарган. Кийинчерээк компания соттордо менчик укугун талашкан.
«Grexton Investment Group» ЖЧКсы да Алтын-Жылга кенине берилген лицензия боюнча сотторго кайрылган.
Маалымат үчүн
Алтын-Жылга — Кыргызстандагы алтын кени, анда болжол менен 7,14 тонна алтын камтылган, ал эми кендин орточо запасы 1073 миң тоннаны түзөт. Алтындын курамы орточо эсеп менен 6,65 г/т түзөт.