АКИpress - Министрлер кабинети 2026-жылдын 17-мартында бизнеске текшерүү жүргүзүүгө убактылуу мораторий киргизүү тууралуу токтом долбоорун коомдук талкууга чыгарды.
Документти Экономика жана коммерция министрлиги иштеп чыккан. Анда ишкерлерди 2026-жылдын 31-декабрына чейин текшерүүгө тыюу салуу сунушталууда. Чектөө бизнести текшерүүгө укугу бар укук коргоо жана башка мамлекеттик органдарга тиешелүү болот.
Ошол эле учурда мораторий айрым учурларга жайылтылбайт. Тактап айтканда:
- кылмыш жана жарандык иштердин алкагындагы текшерүүлөргө;
- ишкерлердин өздөрүнүн арызы боюнча жүргүзүлгөн текшерүүлөргө;
- жарандар менен уюмдардын кайрылууларынын негизиндеги текшерүүлөргө;
- башка өлкөлөрдүн мамлекеттик органдарынын сурамдары боюнча, ошондой эле мыйзам бузуу фактылары ырасталган учурда мамлекеттик органдардын жана жергиликтүү бийликтин материалдарынын негизинде жүргүзүлгөн текшерүүлөргө мораторий күчүн жоготот.
Мындан тышкары, тыюу бажы көзөмөлүнө, президенттин өзүнчө жарлыгы менен чектелген алкактагы салыктык текшерүүлөргө, Улуттук банктын банк тармагындагы текшерүүлөрүнө жана жарандык авиация жаатындагы текшерүүлөргө жайылтылбайт.
Долбоордо токтомдун аткарылышы үчүн жеке жоопкерчилик укук коргоо жана башка ыйгарым укуктуу органдардын жетекчилерине жүктөлүшү сунушталган.
Ошондой эле бул маселе боюнча 2024-жылдын 8-майындагы мурдагы Министрлер кабинетинин токтомун күчүн жоготту деп таануу пландалууда. Анын ордуна мамлекеттик органдарга мыйзам бузууга жол бербөө үчүн туруктуу негизде профилактикалык иштерди жана консультацияларды жүргүзүү сунушталууда.
Токтомдун аткарылышын көзөмөлдөө Президенттик администрациянын президент менен Министрлер кабинетинин чечимдеринин аткарылышын көзөмөлдөө башкармалыгына жүктөлөт. Эгер документ кабыл алынса, ал расмий жарыялангандан 15 күн өткөндөн кийин күчүнө кирет.