08:47, Үчтүн айынын он сегизи, 2020
23:29, Үчтүн айынын он жетиси, 2020443 Ошто уюшкан кылмыштуу топтун мүчөсү кармалды
22:00, Үчтүн айынын он жетиси, 2020211 Оштун бюджети 194,9 млн сомго көбөйөбү?
Учурда окулуп жатат
18:15, Үчтүн айынын он жетиси, 2020 (19 адам окуп жатат)
Маянабыз кыскарды деген аксылык мугалимдерге министрлик жооп кайтарды
12:18, Үчтүн айынын он жетиси, 2020 (0 адам окуп жатат)
Карта-схема конфликтов вокруг анклава Ворух в Баткенской области

Аптадагы урунттуу окуялар: 176 адамдын өмүрүн алган кырсык, депутаттын бир тууганынын кармалышы

14:18, Үчтүн айынын он бири, 2020 4524

Баракелде -  Узап бара жаткан апта бир катар урунттуу окуялар менен коштолду. Алардын арасында кылмыштар жана кырсыктар, спорт жаңылыктары, үй-бүлөдөгү зомбулук сыяктуу окуялар бар. Дүйнөдө жана Кыргызстанда болгон маанилүү окуялардын топтомун сунуштайбыз.

------------------------------------------------------------

Бул апта жагымдуу жаңылык менен башталды. Кыргызстандык спорчу Айсулуу Тыныбекова кыз-келиндер арасындагы мыкты балбандардын дүйнөлүк рейтингинде 1-орунду ээледи. Дүйнөлүк рейтинг 2019-жылдагы Казакстандын Нур-Султан шаарында өткөн чемпионаттын жыйынтыгы менен түзүлдү. Анда Тыныбекова эркин күрөш боюнча дүйнөлүк чемпионатты жеңип, алтын медалдын ээси болгон.

Снимок экрана от 2020-01-06 16-46-55

Америкалык Рейчел Сайн Кыргызстандын тарыхындагы күрөш боюнча алгачкы дүйнө чемпиону Айсулуу Тыныбекова тууралуу даректүү тасма тартты.

«2018-жылдан тарта бул долбоор менен иштеп баштадым. Ал убактан бери Айсулуу койгон максатына жеткен, күчтүү адам экенин көрдүм. Дайыма анын эрки жана чечкиндүүлүгүнө суктанып келем. Ал Кыргызстан гана эмес, дүйнө жүзү үчүн жаңы тарыхты жаратып жатат.

Бул тасма бардыгын таң калтырат. Себеби анын мааниси абдан терең. Бүгүнкү күндө аны дүйнө чемпиону катары көрүү оңой, бирок бул жеңишке алып келген 10 жылдык эмгекти элестетүү кыйын. Айсулуунун жашоосу өтө таасирдүү. Аны сиздер менен бөлүшүүгө шашып турам», - деди Рейчел Сайн.

------------------------------------------------------------

Кыргызстандык мушкер Валентина Шевченко UFC уюмунда эң көп акы төлөнгөн алдыңкы 10 спортчунун катарына кирди.

«Harcord.com» порталы билдиргендей, жеңил салмак боюнча чемпион UFC уюмундагы карьерасында 1 млн 139 миң доллар тапкан. Бул рейтингде америкалык мушкер Ронда Роузи 4 млн 275 миң доллар менен 1-орунду ээледи.

Шевченконун UFC уюмундагы дебюту 2015-жылдын декабрь айында болгон. Андан бери мушкер 9 беттеш өткөрдү. 2018-жылы ал жеңил салмак боюнча чемпиондук курун утуп, эки жолу коргогонго жетишкен.

204165_23027d2264823c9a71965411359e210b

------------------------------------------------------------

4-январда Баткен шаарында каза болгон жаш келиндин өлүмүнүн чоо-жайы такталды. Бул тууралуу Turmush басылмасынын аймактык кабарчысы маалымдады.

Өздүк булактардын маалыматына караганда, 1993-жылы туулган келин жолдошунун ур-токмогунан каза тапкан. Ошол күнү жубайлардын ортосунда пикир келишпестик чыккан. Жолдошу келинчегин уруп-сабап, андан соң түнкү саат 1:00 чамасында өзү медициналык тез жардам кызматын чакырып, Баткен облустук бириккен ооруканасына жеткирген. Дарыгерлерге «өзү жыгылып калды» деп айткан. Бирок келиндин денесиндеги күйүк, көгөргөн тактардан улам дарыгерлер милицияга кабарлашкан. Милиция кызматкерлери кылмышка шектүү катары ошол эле күнү күйөөсү С.Ш.А.ны кармашкан. Эртеси күнү соттук-медициналык экспертиза жүргүзүлгөн соң келиндин денеси жакындарына тапшырылды.

Алдын ала маалыматтарга караганда, ал күнү күйөөсү мас абалда болгону айтылып жатат. Келин 5 бир туугандын улуусу болгон. Жубайлардын ортосунда 2 уул, 1 кызы бар.
---------------------------------------------------------------
Австралияда эки айдан бери токой өрттөнүп жатат. Жапайы жаратылыштын дүйнөлүк фонду өрттүн кесепетинен 1,25 миллиард жаныбар жок болушу мүмкүн экенин айтты.

Сидней университетинин экологдорунун эсеби боюнча сентябрдан бери 500 миллиондон ашуун сүт эмүүчү, сойлоочу жаныбарлар жана канаттуулар өрттөн жок болушкан. Өлкө боюнча 200дөй өрт чыкканына байланыштуу бул көрсөткүч күндө күч алууда.

Ошондой эле 6,5 млн гектар токой, 2 миңден ашуун турак үй, 3 миңдей административдик курулуштар өрттөндү. Жыл башынан бери өрттүн кесепетинен Жаңы Түштүк Уэльс штатында 400дөй, ал эми Викторияда ондогон үй талкаланды. Региондордо электр жарыгы өчүп, өзгөчө кырдаал жарыяланган.

---------------------------------------------------------------

Ирандын генералы Касем Сулеймани 3-январда ракеталык соккудан улам каза болгон. Бул Американын президенти Дональд Трамптын буйругу менен ишке ашырылды. Американын Коргоо министрлигинин расмий билдирүүсүндө Сулейманиге болгон чабуул чет өлкөдөгү америкалык жарандарды коргоо максатында жасалганы айтылган.

Маркум генералды акыркы сапарга узатуу зыйнатына миллиондон ашуун адам келип, тыгын жаралды. Мындан улам 50 адам каза болуп, дагы 200дөн ашык адам жабыркады.

------------------------------------------------------------

8-январда эртең менен Ирактын батышында жайгашкан «Айн аль-Асад» аскердик аба базасына Иран тараптан ракеталык чабуул жасалган. Ал жерде америкалык аскерлер бар экени Ислам революциясынын коргоо корпусунун билдирүүсүндө айтылат.

Базаларга жасалган чабуулдун кесепетинен 80 адам каза болгонун Ирандын Twitter'деги «Press TV» каналы маалымдаган болчу.

Ал эми АКШнын президенти Дональд Трамп: «Американын базасына жасалган чабуулда бир дагы америкалык жаран каза болгон жок. Алдын алуу эскертүү системасы абдан жакшы иштеди», - деди.

------------------------------------------------------------

Иранда кулап түшкөн Украинанын учагындагы жүргүнчүлөрдүн баары каза болду. Бул маалыматты мамлекеттик жалпыга маалымдоо каражаттарына шилтеме берүү менен «Reuters» басылмасы жарыялады.

Украинанын учагы Тегерандагы Имам Хомейни атындагы эл аралык аэропортто кулап түшкөн. Аэропорттун кызматкерине шилтеме берген «РИА Новости» басылмасынын маалыматы боюнча, бортто 167 жүргүнчү, экипаждын 9 мүчөсү болгон.

Алдын ала маалыматтар боюнча, учак абага көтөрүлгөндөн кийин эле кулап түшкөн. «Reuters» басылмасынын маалыматы боюнча, кырсык «Boeing 737» учагында болду.

------------------------------------------------------------

Каракол шаарында жубайына бензин чачып, өрттөп жиберүүгө шектүү делип анын жарандык никедеги жолдошу кармалганын Ысык-Көл ОИИБдин басма сөз кызматы маалымдаган.

Жабырлануучу Б.Сатина Turmush басылмасынын кабарчысына билдиргендей, Нурбек анын экинчи жолдошу.

«Биз 2017-жылы таанышканбыз. Ошондон бери чогуу жашайбыз. Бирок никеге турган эмеспиз. 2018-жылы ал эки досу менен муздаткыч уурдап, убактылуу кармоочу жайга түшүп калган. Анда милиция эскертүү менен чыгарган болчу. Бирок эскертүүнү эске албай, мага саям деп бычак көтөргөн. Ошондо мен арыз жазып, кайра камалган. Ал 2019-жылдын январь айында бошогон. Камактан чыкканда оңолду деп ойлогом. Жүрүм-туруму да жакшы болуп калган.

Мен Каракол шаарындагы базарда бирдик жүктөп иштечүмүн. Жумушка кеткен сайын кызгана берчү. Тапкан акчама ага тамак, кийим алып берчүмүн», - дейт жабырлануучу.
Анын айтымында, окуя 4-январда саат 16:20 чамасында болгон.

«Бир ай мурда ажырашканбыз. Мага талак берген. Бирок базарда арак ичип, мени кайтарып жүрө берчү. 2-январда келип, мен айылга кетип бара жатсам кичи автобуска кошо түшүп алды. Сөгүнүп, бетиме түкүрүп кетип калган. 3-январда дагы келиптир. Анда курбумду чакырганда, ал качып кетти. Анын жолдошуна "эртең өрттөп өлтүрөм" деп айтыптыр. Мен аны ушунчага барат деп ойлогон жокмун. Эртеси бирдик жүктөгөн будкада отурсам сыртымдан бекитип, бир литр бензинди чачкан соң, заматта өрттөп жиберди. Мен ал жерден чыгууга аракет кылдым. Бирок өрт каптап, кийип жүргөн юбкам бутума жабышты. Терезесинен чыгууга аракет кылып жатканда базардагы адамдар чыгарып калышты. Алар жардам берип, тез жардам чакырышты», - дейт ал.

------------------------------------------------------------

«Фактчек.кг» басылмасынын журналисти Болот Темировко кол салуу болду. Бул тууралуу аталган басылма социалдык түйүндөгү баракчасына жазды.

Басылманын маалыматында, редакциянын мекемесинин жанынан Темировду 3 белгисиз жаран сабап, телефонун тартып алган.

Ал эми Бишкек ШИИБдин басма сөз кызматы аталган фактыны тастыктады. 9-январда болжол менен 12:45 чамасында «102» кызматына Эркиндик бульвары менен Токтогул көчөсүнүн кесилишинде белгисиз жарандар журналистке кол салганы тууралуу билдирүү түшкөн.

«Окуя болгон жерге Биринчи май райондук тергөө тобу барды. Учурда ал жерде милиция кызматкерлери иштеп жатат», - деп билдирген ШИИБдин басма сөз кызматынын башчысы Улан Жумаков.

«Фактчек.кг» басылмасы фактылар жана иликтөөлөрдү тактоого багытталган. Сайттын иши «Сорос-Кыргызстан» фонду тарабынан колдоого алынган.

Болот Темиров

------------------------------------------------------------

Экономикалык кылмыштарга каршы күрөшүү кызматынын кызматкерлери тарабынан Мамлекеттик миграция кызматынын алдындагы Маалыматтык-консультациялык борбордун директору Бахтияр Төлөнов кармалды. Бул тууралуу 9-январда АКИpress агенттигине булактар билдирген.

Ал Манас проспектиси менен Жибек жолу көчөсүнүн кесилишиндеги кафеден 800 доллар пара алып жаткан жеринен кармалган.

Бахтияр Төлөнөв — Жогорку Кеңештин депутаты Данияр Төлөновдун бир тууганы. Д.Төлөновдон бул боюнча комментарий алууга мүмкүнчүлүк болгон жок. Ошондой эле Б.Төлөнов чет өлкөдөгү кыргызстандык жарандардын жумуш ордуна квота берүү боюнча комиссиянын төрагасы кызматын ээлейт.

------------------------------------------------------------

Таластан Бишкекке алынып келген жарадар ак илбирстин башынан 70дей октун чачмалары табылды. Бул тууралуу Курчап турган чөйрөнү коргоо жана токой чарбасы мамлекеттик агенттигинен билдиришти.

Кечээ, 9-январда Талас районунун Көк-Ой айылындагы Булбул-Жар токоюнда жарадар болгон ак илбирс табылган. Ал дарактын башында түшө албай отурган болчу.

Учурда адистер өмүрүнө коркунуч жаратып турган 18 октун чачмаларын алышты. Алардын айтымында, калгандары анчалык коркунуч жаратпайт.

Ал эми экологдор ак илбирс операциядан кийин Ысык-Көл облусундагы калыбына келтирүү борборуна жеткирилип, толугу менен жакшы болгондон кийин эркиндикке чыгарыла турганын билдиришти.

------------------------------------------------------------

Бүгүн, 11-январга караган түнү кыргыз-тажик мамлекеттик чек ара тилкесинде абал туруктуу деп мүнөздөлдү. Бул тууралуу Мамлекеттик чек ара кызматынан билдиришти.

Маалыматка караганда, чек ара кезметтери мамлекеттик чек аранын шарттуу сызыгын бойлоп күзөт жүргүзүштү. Укук коргоо органдары чек арага жакын аймакта жана чек ара кезметтери жүргөн багыттарды бойлоп коомдук тартипти камсыздашты.

«Түн ичинде маал-маалы менен Тажикстан Республикасынын аймагында болжол менен мергенчилик куралдан ок атылган үндөр угулуп турду. 11-январда болжол менен саат 00:40та Баткен облусунун Баткен районунун Төрт-Көчө жергесинде Баткенге бара жаткан Кыргызстандын жаранына тиешелүү "Вольво" үлгүсүндөгү унааны Тажикстандын жарандары таш менен ургулап, жүк ташуучу унаанын маңдайкы айнегин талкалашкан. Баткен облусунда жайгашкан чек ара тарамдары күчөтүлгөн тартипте кызмат өтөөнү улантышууда», - деп айтылат маалыматта.

------------------------------------------------------

10-январга караган түнү саат 00:40 чамасында Баткен облусунун Баткен районунун Жака-Өрүк жергесинде белгисиз адамдар Баткен шаарына бара жаткан Кыргызстандын жаранына таандык унааны таш менен ургулашкан. Белгисиз адамдар Тажикстандын аймагына кире качышкан.

Кыргызстандын укук коргоо органдарынын маалыматы боюнча унаанын ичиндеги Кыргызстандын жарандарынын арасынан жаракат алгандар бар. Унаанын арткы жана капталдагы айнектери талкаланган.

Село Кок-Таш Баткенского района

«Бир сааттан кийин Баткенден Көк-Ташка кетип бара жаткан Кыргызстандын башка жаранынын унаасын Тажикстандын жарандары Көчө-Карын жергесинде таш менен ургулашкан. Унаанын маңдайкы айнеги талкаланган. Саат 02:40 чамасында Дахма жергесинде Тажикстандын жарандары Кыргызстандын жаранынын үйүн таш менен ургулашкан. Кыргызстандын ал жаранынын үйүнө укук коргоо органдарынын өкүлдөрү менен бирге бараткан чек арачыларга карата Тажикстан тараптан майда калибрлүү мергенчилик куралдан ок чыгарылган. Ок атуулар тажик тараптан гана чыгып, маал-маалы менен кайталанууда», - деп айтылган Чек ара кызматынын маалыматында.

Бул факттар Кылмыштар жана жоруктардын бирдиктүү реестрине катталып, сотко чейинки өндүрүш иши жүрүп жатат.

Село Кок-Таш Баткенского района


Пикирлер
Для добавления комментария необходимо быть нашим подписчиком