Москвада жол талашкан ишкер кыргызстандык таксистти газ тапанчасы менен атты
На русском
Баракелде - Россиянын Москва шаарында ишкер таксисттерге газ тапанчасын атты. Алардын арасында кыргызстандык жаран болгонун «Life.Ru» басылмасы ИИМдин башкы башкармалыгына шилтеме берүү менен билдирди.
Полициянын нөөмөт бөлүмүнө Кыргызстандын жараны кайрылган. Анын айтымына караганда, 20-ноябрда саат 17:00 чамасында ал «Форд Фокус» үлгүсүндөгү унаасын айдап бара жатып жол тыгынына кабылган. Ошол учурда ага белгисиз эркек киши басып барып, алдыда тыгын болгонуна карабастан жолду бошотууну талап кылган.
Басылмага белгилүү болгондой, ал ишкер 33 жаштагы Илья Сачков — «Group-IB» компаниясынын ээси болгон.
Чыр-чатактын жүрүшүндө Сачков газ тапанчасы менен кыргызстандык таксист тарапка аткан. Газ жабырлануучунун көзүнө, кийимине жана колуна тийген. Андан кийин ишкер кесиптешине жардам бергиси келген башка таксистке карай дагы газ тапанчасын аткан. Бирок ал тийген эмес.
Полиция кызматкерлери шектүүнү кармап, бөлүмгө жеткиришкен. Ал эми жабырлануучу денесинен жаракат алган.