18:54, 10 бештин айы 2019
Доска Авто Недвижимость Компании Кто есть кто Мнения читателей Ойно Работа Справочник АКИ-TV Баракелде Булбул

«2 жыл мурун көчөгө боштондукка чыккандай болдум»: А.Көчөрбаева 36 жашында «Баатыр эне» наамын алган (сүрөт)

15:45, 14 жетинин айы 2019 33

Баракелде -  Кара-Буура районунун Буденный айылынын 41 жаштагы тургуну Астра Көчөрбаеванын балдары удаа төрөлүп, 2 жыл мурда көчөгө чыгып, өзүн эркиндикке чыккан адамдай сезген. Аймактык кабарчы аны менен таанышты.

Анын айтымында, өзү да көп балалуу үй-бүлөдө чоңойгон.

«1995-жылы айылдашыма турмушка чыккам. Экөөбүз тең көп балалуу үйдөн чыкканбыз. Апаларыбыз баатыр энелер. Мен алардын жолун жолдодум. Азыр 4 уул, 3 кыздуубуз. 11-классты бүтүп турмушка чыккандыктан кесибим жок. Кол өнөрчүлүктү аркалап кыздарыма дагы үйрөтөм келе жатам. Көп бир тууган болгондун артыкчылыктары дагы көп. Бирин-бирине жөлөк болушат. 2 жыл мурун көчөгө боштондукка чыккандай болуп өзүмө-өзүм таң калганымды унутпайм. Себеби 1996-жылы алгачкы балалуу болгонбуз. Ошондон бери балдарыбыз менен алпурушуп жүрүп баары кайталанган рефлекс сыяктуу болуп калыптыр. Кимиси ыйласа сооротуп, үйгө баш-көз болуп, тиричиликти кошо алып кетүү айымдардын мойнунда эмеспи. Азыр эми шүгүр, ыйлаган бала жок, курсагы ач болот деп ойлонбойм. Баары чоңоюп калышты (күлүп).

Бала деп жашап, ар биринин кыял-жоругуна энелер чыдайт экенбиз. Ошондуктан алардан бактылуу инсандар өсүп чыкса деп тиленем. Балдарыбыз элден артта калбасын деп иштеп келебиз. «Баатыр эне» сыйлыгын 2015-жылы үйгө алып келип беришкен. Аябай кубангам, бир четинен карып калгандай сезим келет экен. Себеби баатыр эне десе чоң апалар эсибизге келет эмеспи (күлүп).

Балдарыбыз техникаларга жакын. Тилин бат эле табышат. Экинчи балам трактордун айрым тетиктерин 5 жашында эле билип калган. Анткени жолдошум өзү трактор айдачу. Өзүмдүн атам «МТЗ 80» тракторун айдап үйгө келген. Бир кезде тракторду артка жылдырыш керек болуп, жолдошум кабинага отурган экен. Атам тракторунун кээ бир жерлерин колго өзгөчөлөп жасап алгандыктан ылдамдатуучу жерин таппай коюптур. Жанында балабыз отурган. Ал көрсөтсө аны жаш болуп эмнени билмек эле дегенсип аны тынч отур деп койгон экен. Канча бир убакыттан кийин баягы балабыз айткан жерди басса трактор жылган экен. Ошондон бери атасы ал балабыз менен техника жаатында кеңешип турат.

Бир күнү кичинекей балабыз жок. Издеп такыр таппай койдук. Эми атасы келип укса урушат го деп чыйпылыктап жүрөбүз. Бир маалда атасы келип, суу ичип алайынчы деп суу куйган фляганы ачса балабыз ошол жакта уктап отурган экен. Көрсө балдар менен ойноп, алардан бекинем деп кирип уктап калган экен. Ошондой учурлар көп болуп калчу. Аларга кабатыр болуп, түйшүк тарткан күндөрүм эсимде», - деди ал.

Астра айымдын уул-кыздары:

Абдраимов Элдияр 1996-жылы төрөлгөн;

Абдраимов Бекзат 1997-жылы төрөлгөн;

Абдраимова Акылай 2003-жылы төрөлгөн;

Абдраимов Болот 2005-жылы төрөлгөн;

Абдраимова Элмира 2007-жылы төрөлгөн;

Абдраимова Зейнеп 2009-жылы төрөлгөн;

Абдраимов Мырзабек 2011-жылы төрөлгөн.

Пикирлер
Для добавления комментария необходимо быть нашим подписчиком