18:54, 10 бештин айы 2019
Доска Авто Недвижимость Компании Кто есть кто Мнения читателей Ойно Работа Справочник АКИ-TV Баракелде Булбул

«Азыркы жолдошума кайын энем өзү турмушка узаткан»: Гүлзина апа менен Аден атанын баяны (сүрөт)

15:00, 14 жетинин айы 2019 44

Баракелде -  Талас шаарындагы 73 жаштагы Жунушалиев Аден ата менен 63 жаштагы жубайы Гүлзина Аттокурова 17 жылдан бери чогуу түтүн булатып келе жатышат. Аймактык кабарчы жубайлардан кабар алды.

Жубайы: Мен Талас районунун Талды-Булак айылында төрөлгөм. Убагында колхоздо катчы болуп 3 жыл эмгектенгем. Бойго жетип, 1979-жылы Талас районунун Арал айылына келин болгом. Жолдошум Оморов Малабек менен 14 жыл бирге жашадым. Экөөбүз малчы болдук. Жашообуз жакшы болду. Идиш-аяк кагышканы менен көгала кылып сабаган жок. Ынтымактуу жашадык. Бирок бактылуу жашообуз бат эле аяктады. Жолдошум 1993-жылы жүрөк оорусунан каза болду. Ортобузда 1 кызыбыз бар эле. Кызым менен жалгыз калдым. Союз тарап жашоо оорлошту. Өзүмдүн төркүндөрүм, кайын журтум жардамдарын аяшкан жок. Колдон келген жардамдарын берип жүрүштү. Өзүм жөн олтурбай кол өнөрчүлүк менен алектендим. Айылдагы кемпир-чалдарга чапан, көйнөк, чыптама тигип жүрдүм. Ошентип жүрүп арадан 10 жыл өтүп кетиптир. Кайын энемдин колунда жүрдүм. Кызым жаш болгондуктан турмушка чыгуу оюма келген жок. Анткени кызымды көз каранды кылгым келчү эмес. Арадан көп убакыт өткөндөн кийин кайын энем мага турмушка чыгуумду айтты. Башында ыйлап, мени эптеп эле кетире албай жүрөт деп жаман болуп жүрдүм. Кайын энем көндүрүп олтуруп макулдугумду алды. Ал убакта кызым да чоңоюп калган эле. Айласыз макул болдум. Кайын энем азыркы жолдошум менен өзү тааныштырган. Анын да жубайы каза болуп калган экен.

Бир күнү эле азыркы жолдошумдун улуу кызы менен баласы келип, «Биз сизди апа кылып алабыз. Бизге апа болуңуз» деп келишкен. Алар кеткенде аябай ыйладым. Кызымды кандай кабыл алат, балдары менен тил табышып, эне баладай мамиледе болуп кете алабызбы же жылуу ордумдан козголбой эле койсомбу деп көп ойлондум, ыйладым. Арал айылы кичинекей болгондуктан ушак бат эле тарап кетти. Балдар улам келип макулдугумду алышты. Кайын агамдар, абысындарым менен келишип, «биз батабызды берели. Кызың турмушка чыгып кетсе жалгыз каласың. Кызыңа да төркүн керек» деп байма-бай келип жүрүштү. Буйрук экен 2002-жылы азыркы жолдошум экөөбүз баш коштук. Биздин башыбызды балдар эле кошту. Кайын энем менен катташып турдум. Ал менин бактылуу болуп кетишимди каалады. Көзүн жашын мага көрсөтпөй ыйлап, бетимен сүйүп турмушка узаткан.

Жолдошум Аден 1947-жылы Талас районунун Арал айылында туулган. 45 жылы оор жүк ташуучу унаа айдап иштеген. Эч нерседен кем кылбай бакты. 2018-жылы мен эми карыдым деп жумушун токтоткон. Ата жолун жолдоп 3 балабыз оор жүк ташуучу унааларды айдайт. Жолдошум экөөбүздүн 3 бала, 5 кызыбыз, 30 небере, 4 чөбөрөбүз бар. Кудайга шүгүр, алар мени өз энесиндей, мен аларды өз балдарымдай кабыл алдым. Кудайдын кулагы сүйүнсүн, азыр бактылуу карылыкты бирге өткөрүп жатабыз. Жашоого ыраазыбыз. Өткөн иш өттү, баары унутулду. Азыр небере жыттап олтурган учурубуз. Балпайган таене, таята болдук. Кыздын кызын, балдардын балдарын жетелеп жүргөн чагыбыз.

Аден ата: Өмүр бою айдоочу болуп иштедим. Менин да биринчи жубайым каза болуп калган. Жалгыз калган жаман экен. Картайганда жаныңда эрмектешип, бирге чай ичкен адам болсо жакшы экен. Ошол нерсени балдарым көп айтып үйлөндүрүштү. Жакшы адамга туш болдум. Эң башкысы балдарым мага ыраазы. Байбичем балдарым үйгө келсе жылуу тосуп алып узатат. Жумуштан келсем ысык тамак даярдап күтүп турат. Эми жашоодо баары болот экен. Экөөбүз тең сыноону көрдүк. Бир-бирибизди жакшы түшүнөбүз. Азыр баарына шүгүр.

Пикирлер
Для добавления комментария необходимо быть нашим подписчиком