19:59, 19 тогуздун айы 2019
Доска Авто Недвижимость Компании Кто есть кто Мнения читателей Ойно Работа Справочник АКИ-TV Баракелде Булбул

«Кыргызнефтегаз»: Аймактагы масштабдуу салтанат жана жетишкен ийгиликтер

18:56, 15 аяк оона 2019 4147
«Кыргызнефтегаз» ААКтын төрагасы Рашит Бостонов
«Кыргызнефтегаз» ААКтын төрагасы Рашит Бостонов

Баракелде -  Өлкөдөгү ири өнөр жай ишканаларынын сап башында турган Жалал-Абад облусунун Кочкор-Ата шаарында жайгашкан «Кыргызнефтегаз» ишканасынын эмгек жамааты 13-14-сентябрь күндөрү кесиптик майрамын белгилешти. Кыргыз нефтичилеринин борбору катары саналган Кочкор-Ата шаарындагы борбордук стадиондо уюштурулган салтанатка 10 миңдеген шаар тургундары жана коноктор катышты. Бул тууралуу аталган компаниядан билдиришти.

Майрамдын алкагында 13-сентябрда спорттун кулатуу эртаймаш түрү боюнча эл аралык турнир өттү. Ага Чеченстан, Өзбекстан, Тажикстан, Кыргызстан өлкөлөрүнөн жалпысынан 50дөн ашык спортчулар катышкан. Эл аралык турнирге «Кыргызнефтегаз» ААКсы демөөрчүлүк кылып, спорт сүйүүчүлөрүнө майрамдык маанай тартуулады.

Ал эми негизги иш-чара 14-сентябрда борбордук стадиондо өттү. Салтанатка Жогорку Кеңештин депутаттары — Талант Мамытов, Азамат Арапбаев, Мамлекеттик мүлк фондунун төрагасы Жылдызбек Исакулов, «Кыргызнефтегаз» ААКнын төрагасы Рашит Бостонов жана өкмөттүн Жалал-Абад облусундагы өкүлүнүн орун басары Мамасалы Акматов баштаган жергиликтүү бийликтин өкүлдөрү катышып, ары оор, ары түйшүктүү кесип ээлерин майрамы менен куттукташты.

«Нефть жана газга болгон дүйнөлүк кризис, энергоресурстардын тартыштыгы жаралып жаткан учурда нефть, газ жана отун өнөр жай кызматкерлеринин майрамы жалпы коомчулуктун майрамы болуп калды. Анткени сиздердин жумуш эң татаал, эң опурталдуу жана жоопкерчиликтүү. Ар бир үйгө жылуулук тартуулаган, ары сыймыктуу, ары мыкты кесиптин ээлери — сиздерди майрамыңыздар менен куттуктайм. Эч убакта үйлөрдүн коломтосу өчпөсүн», - деди Мамлекеттик мүлк фондунун төрагасы Жылдызбек Исакулов.

Ал эми өкмөттүн Жалал-Абад облусундагы ыйгарым укуктуу өкүлүнүн орун басары Мамасалы Акматов аталган ишкана облустун экономикасын алга сүрөгөн ири мекеме экенине токтолду.

«Кыргызнефтегаз» акционердик коому өздөрү өндүргөн жаратылыш газы менен Майлуу-Суу, Кочкор-Ата жана облустун борбору болгон Жалал-Абад шаарынын калкын камсыздап келет. Ушул жылы Ноокен районунун инфраструктурасын өнүктүрүү багытында райондун өнүктүрүү фондуна кен байлыктарды сатуудан 70 млн сомдон ашуун каражат бөлүнө турганы күтүлүүдө», - деди Мамасалы Акматов.

Майрамды нефтичилер сыяктуу эле шаардыктар жана коноктор да күтүшөт. Анткени өзгөчө жасалгаланган сахнада жоон топ кыргыз эстрада жылдыздарынын гала-концерти бул аймакта боло бербейт. Быйыл нефтичилердин кесиптик майрамын куттуктап Кыргыз Республикасынын эмгек сиңирген артисттери — Бек Борбиев, Майрамбек Осмонов, Гүлжигит Сатыбеков, Гүлзада Рыскулова, эстрада ырчылары Нурлан Насип, Сайкал Садыбакасова, Малика Дина жана башка жылдыздар келишти. Ошондой эле «Саламандра» фаер-шоу тобу өз өнөрүн тартуулады.

Борбордук стадиондо өткөн майрамдык салтанатта жумушунда өзгөчөлөнгөн бир топ кызматкерлерге мамлекеттик сыйлыктар жана өкмөттүн, мүлктү башкаруу фондунун жана башка ишканалардын ардак грамоталары тапшырылды. Ошондой эле «Кыргызнефтегаз» ишканасынын технологиялык транспорт башкармалыгынын башчысы Бекболот Султанов президенттин жарлыгы менен Кыргыз Республикасынын «Даңк» медалы менен сыйланды.

Кыргызстанда жыл сайын сентябрь айында нефть жана газ өнөр жайынын кызматкерлеринин кесиптик майрамы белгиленип келет. Бул жааттагы абал тууралуу «Кыргызнефтегаз» ишканасынын төрагасы Бостонов Рашит Абдумаликовду кепке тарттык.

«Алгач учурдан пайдаланып жалпы нефтичилерди, кесиптештеримди куттуктайм! Сиздерге чың ден соолукту, тынчтыкты жана эки дүйнөлүк бактылуулукту жараткан Аллахтан суранып кетер элем», - деп сөз баштады Рашит Бостонов.

- Өткөнгө саресеп сала турган болсок, «Кыргызнефтинин» тарыхы 1880-жылдарга барып такалат. 1901-жылы V пласттан 5 миң тоннадан ашык нефть алынып, биринчилерден болуп Майлы-Сай кени ачылган. 1940-жылы Майлуу-Суу-4, 1944-жылы Избаскент, 1946-жылы Чыгыш Избаскент кендери ачылган. Ал эми 1952-жылы «Кыргызнефть» өндүрүштүк мекемеси түзүлгөн. Союз учурунда «Кыргызнефтегаз» өндүрүштүк мекемеси нефть өндүрүүнүн көлөмүн 1958-жылы 490 тоннага жеткирген. Чалгындоо, бургулоо, өндүрүү жумуштарына ири өлчөмдө каражат жумшалып келген. Ал эми 1980-1990-жылдардын аралыгында 218 миңден 155 миң тоннага чейин нефть өндүрүлүп келген. Буюрса биз ошол жылдагы деңгээлге жетебиз деген ишенимдебиз.

- Быйыл кандай жумуштарды аткардыңыздар жана жыл башында белгилеген пландар ишке ашып жатабы?

- Төрага катары 2019-жылы «Кыргызнефтегаз» ачык акционердик коомунун аткарган жумуштары жөнүндө бир аз маалымат берип кетейин. Көпчүлүккө белгилүү болгондой, мекеменин экономикалык көрсөткүчтөрү жыл сайын өсүүдө.

Мунай өндүрүү боюнча ушул жылдын 8 айында планда каралган 73 миң тоннанын ордуна 86 миң тонна мунай өндүрүүгө жетиштик. Коюлган планды 118 пайызга ашыгы менен аткардык десек жаңылышпайм. Биздин акционердик коом 2019-жылы 115 миң тонна мунай өндүрөбүз деп өзүбүзгө чоң тапшырма койгонбуз. Алдыда дагы жыл жыйынтыктоого бир нече ай бар, андыктан кесиптештерибиздин жигердүү эмгеги жана талыкпас мээнети менен 140 миң тоннадан кем эмес нефть өндүрүүнү максат кылуудабыз. Өлкөбүздө тынчтык жана стабилдүүлүк болсо, биздин алдыга койгон максаттарыбыздын орундалышына шек жок.

Бул максатты ишке ашыруу үчүн биз заманбап ыкмаларды колдонуп, 2019-жылы 30 мунай кудугунда ГРП (пластты гидравликалык кеңейтүү) жумуштарды аткарууну пландаштырганбыз. 8 айдын ичинде 21 нефть кудугунда ГРП жумуштары жүргүзүлүп, кошумча 3 миң 500 тонна мунай өндүрүүгө жетиштик.

- Мунай менен бирге газ өндүрүүгө да өзгөчө басым жасасаңыздар керек? Бул багытта абал кандай, жылыштар барбы?

- 1970-жылдардан бери табигый газды өндүрүү, бургулоо жумуштары унутулуп калгандай. Соңку 50 жылдын аралыгында газ өндүрүүдө жаңы скважиналар ачылган эмес. Биз бул багытка өзгөчө көңүл буруп, ишти илгерилетүүгө аракеттенүүдөбүз. Кыш мезгилинде газды керектөөчүлөрдүн саны көбөйөт. Ошол себептен муктаждыктарды жоюу үчүн жаңы газ скважиналарын бургулоого өзүнчө аянт бөлүндү. Газды өндүрүүнүн көлөмүн көбөйтүү жана элди, ошондой эле мекеме-ишканаларды газ менен жетиштүү камсыз кылуу максатында бургулоо жумуштары башталды.

- Мунай өндүрүүнүн көлөмүн жогоруталуу үчүн бургулоо жумуштарын да көбөйтүү зарыл эмеспи. Бургулоо жумуштары боюнча токтоло кетсеңиз?

- Быйыл бургулоо иштерине өзгөчө көңүл бурулууда. Бул багытта жалпысынан 493 млн сом акча каражаты бөлүнүп берилди. Бургулоого керектүү болгон бардык шаймандар жана жабдуулар толугу менен алынып келген. 2019-жылы 23 миң 800 погонометр бургулоо жумуштарын аткарууну пландаганбыз. Азыркы күндө 4 бургулоочу бригада иш жүргүзүүдө.

- Ишкананын техникалык абалын жаңылоо багытында кандай жаңылыктар бар?

- Мунайды өндөрүүдө, аны кайра иштетип чыгарууда техникалык база дагы күчтүү болуусу шарт. Техникалар да тынымсыз жаңыланып туруш керек. Бул багытта дагы 2018-2019-жылдын ичинде алгылыктуу жумуштарды аткарууга жетише алдык. Ушул жылдын башында жаңы техникалар алынды. Ошондой эле атайын адистештирилген техникалар жана керектүү шаймандар менен толукталууда. Техникалардын жаңыланышы өндүрүштү өркүндөтүүгө, жумушчулардын ишин жеңилдетип, аларга жакшы шарттарды түзүп берүүгө өбөлгө болот.

- Өзүңүз билгендей, быйыл президент Аймактарды өнүктүрүү жана санариптештирүү жылы деп жарыялады. Президенттин бул демилгесине сиз жетектеген ишкана кандай салым кошууда?

- Бул багытта ишканага таандык мекемелерге, мунай өндүрүүчү участоктордо, адырдагы кудуктарга, жолдорго, өткөрмө пункттарда, мунайды сактоочу кампаларга онлайн көзөмөлгө алуучу видеокамералар орнотулуп, иштей баштады. Бул уурулукка жол бербей, мунай өндүрүүчү, сакталуучу жерлерге адам факторун аралаштырбай, техниканын жардамы менен тыкыр көзөмөлгө алуу аракети болуп саналат.

«Кыргызнефтегаз» ААКсы жергиликтүү бюджетке да салым кошуп келет. Ноокен районунун өнүктүрүү фондуна жыл сайын 2 пайыздык салым катары 70 млн сомдун тегерегинде акча которулууда. Бул каражаттын эсебинен райондун аймагында бир топ социалдык объектилер оңдолуп жатат. Быйыл райондун өнүктүрүү фондуна 90 млн сомго чейин каражат которобуз деген пландарыбыз бар. Ошондой эле 2018-жылдын 8 айынын жыйынтыгы менен республикалык бюджетке 399 млн сом салык жана 148 млн сом социалдык төлөм котордук. Мындан сырткары 2018-жылдын жыйынтыгы менен Мамлекеттик мүлктү башкаруу фондуна 219 млн сом дивидент төлөнгөн.

Жалал-Абаддагы мунайды кайра иштетүүчү заводго чейинки мунай түтүктөрү дагы күчөтүлгөн тартипте көзөмөлгө алынган. Ошондуктан биздин акционердик коомдун кирешесинин жогорулашынын себеби биринчи кезекте жалпы жамааттын бирдиктүү жана тыгыз иш алып баруусунун жыйынтыгы десек туура болот. Кайсы жерде ынтымак болсо, ошол жерде ырыскы болот демекчимин. Эмгек жамаатыбыздын бүгүнкүдөй ынтымагы ишкананын өсүүсүнүн башкы фактору болуп эсептелет.

- Ынтымак деп айтып калдыңыз, «Кыргызнефтегазда» учурда 2,5 миңдей жумушчу эмгектенет. 2010-жылдан кийин ишкана башынан бир топ кыйынчылыктарды да өткөрдү. А түгүл, кызматкерлер иш таштоого чейин барышып, мекеменин тагдыры татаал болуп калган эле. Азыр ал учурдагы жагдайлар ишканада толук жоюлду десек болобу?

- Ушул жерден бир нерсени айта кетейин. «Кыргызнефтегаз» жана Кочкор-Ата ар дайым гүлдөп, өсүүсү үчүн ишканада эмгектенген эки жарым миң адам көп партиялуулукка, уруу-уруулукка, жердешчиликке, тууганчылыкка бөлүнбөстөн, бир жакадан баш, бир жеңден кол чыгарып, кайсы өкмөт болбосун, ошол өкмөттүн саясатын колдоп, иш жүзүнө ашырса, «Кыргызнефтегаз» дагы, Кочкор-Ата дагы, ошондой эле мамлекетибиз дагы өнүгүп, өркүндөй беришине ишенем.

Быйыл кызматкерлердин маянасын 15 пайызга көтөрдүк. Учурда кызматкерлердин орточо эмгек акысы 26 миң сомду түзөт. «Кыргызнефтегаз» ААК соңку жылдарда аткарып жаткан жумуштары өтө көп. Алгылыктуу иштерди атай берсек көп убакыт кетип калат. Биз жасап жаткан жумуштарды коомчулук көрүп, сезип, байкап турат. Ошондуктан мен ишкананын келечегине ишенем. Анткени Кыргызстандагы жалгыз мунай өндүргөн ата мекендик ишкана катары «Кыргызнефтегаз» өлкө бюджетине мындан да олуттуу салым кошо бермекчи.

Пикирлер
Для добавления комментария необходимо быть нашим подписчиком