15:01, 6 бештин айы 2019
Доска Авто Недвижимость Компании Кто есть кто Мнения читателей Ойно Работа Справочник АКИ-TV Баракелде Булбул

Абактагы Жыпаранын тагдыры

На русском
14:20, 2 баш оона 2019 (Жаңыланды: 08:23, баш оона 12 2019) 1204

Баракелде -  Жыпара Степной айылындагы №2 аялдар абагына баңгизат ташууга байланыштуу айып тагылгандан кийин жеткирилген. Ал тагдыры тууралуу АКИpress агенттигине айтып берди.

Жыпаранын жолдошу 2000-жылдары көз жумуп, кызы менен жалгыз калган. Акыры кызын кайындарына (маркум жолдошунун ата-энеси) таштап, Ош шаарынан Бишкек шаарына акча табуу максатында сапар алган. Эмгектенип жүрүп, 2010-жылы Жаңы жыл майрамын кызы менен бирге тосууну пландап, жолго чыкмакчы болот.

«Ошол учурда таанышым жеңил акча табууну сунуштап калды. Болгону Беловодск айылынан Бишкек шаарына килограмм апийим жеткирүү керек болчу. Ал кызмат үчүн мага ошол учурдагы чоң сумма болгон 500 доллар сунуштаган. Мен бир аз ойлонгондон кийин анын сунушуна макул болдум», - деп эскерди Жыпара.

Жыпараны Пишпектеги базардан тосуп алышып, акысын беришмек. Бирок аны такыр башка тагдыр күтүп турган...

«Айтылган жерге барсам 3 жигит турган экен. Бири милиция кызматкеринин кийимин кийип туруптур. Алар менин жаныма басып келип, өздүк документтеримди сурашкан. Бирок менин документтерим жанымда жок экенин айтканымда колумда турган баштыкты ачып көрсөтүүнү талап кылышты», - деди ал.

Жыпара ошол жерден камакка алынып, баңгизат ташууга байланыштуу козголгон кылмыш ишти тергөө иштери аяктагыча абакта (СИЗО) 8 ай отурган. Кийин соттун чечими менен 12 жылга эркиндигинен ажыратылганын айтты.

Учурда Жыпара баңгизатты жеткирүү сунушун кабыл алганына өкүнөт жана ал үчүн өзүн күнөөлүү деп эсептейт. Эми миллиондогон акча сунушталса дагы мындай ишке жолобой турганын белгиледи.

Ал кесиби боюнча финансист болгону менен иштеген эмес. Соттолгонго чейин «Ош» базарында жашылча-жемиш сатып эмгектенген. Ал эми абактан тигүү цехине жумушка орношуп, бирок көзүнүн көрүүсү жакшы болбогондуктан узакка иштей алган эмес.

«Башында айлана-чөйрөнү, мага байланыштуу болуп жаткан окуяны кабыл алуу оор болду. Ошондо абактагы реабилитациялык борборго баргам. Көбүнчө бул жайга баңгизатка көз каранды болуп, аракка берилип кеткендер жана психологиялык жактан жабыркаган адамдар кайрылышат. Мен ал жерге жарым жылдай барып жүрдүм. Кийинчерээк пол жууп иштөөгө чакырышты. Бир айлык маянам 660 сомду түзөт. Ар бир маянамдан 100-150 сомдон чогултуп жатып, азыркы учурда 3000 сомдой топтодум», - деди Жыпара.

Ал боштондукка чыга турган убакыт жакындап калды. Эң биринчи кезекте кызы менен жолугушууну көздөйт. Анын тагдырын кабыл албаган кызы менен азыр мамилеси жакшы эместигин кошумчалады.

«Эмне себептен мындай жолго барганымды кызым түшүнбөй келет. Эркиндикке буюрса жакында чыгам. Биринчи кезекте кызым менен жолугуп, мамилебизди оңдогум келет. Жумуш таап, эл катары жашагым келет», - деди Жыпара.

Пикирлер
Для добавления комментария необходимо быть нашим подписчиком