08:01, 26 бугу айы 2019
Доска Авто Недвижимость Компании Кто есть кто Мнения читателей Ойно Работа Справочник АКИ-TV Куда пойти? Булбул

5 адамдын өлүмү: Медетбек жалгыз агасынан, Курбаналы 20 жашка толо элек кызынан айрылды

13:25, 13 жалган куран 2019 (Жаңыланды: 13:52, жалган куран 13 2019) 4971

Баракелде -  Оштогу Ноокат районунун Төөлөс айыл өкмөтүнө караштуу Өрнөк айылында 2019-жылдын 6-январында таңга маал «Тойота Эстима» менен битум ташыган «МАН-26-464» үлгүсүндөгү унаа кагышканда 5 адам каза болгон. Алардын ичинде 20 жашка толо элек студенттер дагы бар.

5 адам каза болгону менен укук коргоо органдары кайдыгер мамиле жасап, кылмыш иш өтө жеңил берене менен козголду, деп белгилешти маркумдардын жакындары бүгүн, 13-мартта Бишкекте өткөн маалымат жыйында.

Каза болгон 5 адамдын бири — Перизат 2019-жылдын 25-январында 20 жашка толмок. Маркумдун атасы Курбаналы Темирбаевдин айтымында, окуядан кийин 1 ай бою эки айдоочу тең ээн-эркин жүрүп, кийин гана камакка алынды. Ал эми 5 киши өлгөнүнө карабай кылмыш иш 297-берене менен козголуп, анда эң жеңил жазалар каралган.

«Жазык кодекстеги 297-берене менен айдоочуну 2 жылдык унаа айдоо укугунан ажыратып, 300 миң сом гана айып төлөп же 2,5 жылдан 5 жылга чейин эркинен ажыратуу каралган экен. Бул мыйзамда өтө жаңылыш учурлар көп. Бийликтен бул беренени тез арада карап чыгууну суранабыз. Бул берене тууралуу эл такыр эле билбейт. Мен деле билген эмесмин. Кызым өлүп, башыма иш түшкөндө гана билип жатам.

Кийин 135-берененин 2-бөлүмүнүн 2-пункту менен дагы бир иш козголду. Бирок эки беренени кошкондо жалпы 7,5 жылдык гана жаза каралышы мүмкүн экен», - деди К.Темирбаев.

Маркумдун атасы экспертизанын корутундусу таза чыкканына жана сот тарабынан акыйкаттуу чечим чыгарынан күмөн санайт. Буга байланыштуу тиешелүү бийлик органдарынан тиешелүү чараларды көрүүнү суранды.

Маркумдун артында ата-энеси, бир тууган агасы калды.

Бул кырсыктан 28 жаштагы Мукамбет Шайдиллаев дагы каза болду. Анын бир тууган иниси Медетбек Шайдиллаевдин айтымында, ата-энеси каза болгон, өзү болгону 2 бир тууган эле. Эми жалгыз агасынан да айрылды.

«Унаадагы ("Тойота Эстима" унаасында) 8 адамдын ичинен бешөө каза болду. Үчөө — айдоочу, анын артында отурган жигит жана жеңем аман калышты. Жеңем катуу жаракат алып, кабыргалары сынып, көп убакыт ооруканада жатты. Азыр абалы жакшы эмес, оор», - деди Медетбек Шайдиллаев.

Маалымат жыйындын катышуучуларынын айтымында, иш Ноокат РИИБде тергелип, Ноокат райондук сотунун кароосуна жөнөтүлгөн. Азырынча сот отуруму белгилене элек. Учурда 2 айдоочу тең камакта.

Окуя тууралуу:

2019-жылдын 6-январында саат 08:16 чамасында Ош—Исфана унаа жолунун 73-чакырымында, тактап айтканда Ноокат районунун Өрнөк айылында Кадамжай районунун 1982-жылы туулган тургуну А.З.нын башкаруусундагы «Тойота Эстима» үлгүсүндөгү унаа чыгыштан батышка карай бара жатып, каршы багыттагы битум ташыган «МАН-26-464» үлгүсүндөгү жүк ташуучу унаа менен кагышкан. Экинчи унаа Сузак районунун 1986-жылы туулган тургуну Н.С.нын башкаруусунда болчу.

Окуянын кесепетинен «Тойота Эстима» унаасынын жүргүнчүлөрү — 2001-жылы туулган И.у.Т. жана 1990-жылы туулган Ш.М. окуя болгон жерде каза болгон. Алар кызыл-кыялыктар болушкан. Ал эми Бишкек шаарынын Ала-Арча конушунун 1999-жылы туулган тургуну К.Перизат ооруканада көз жумган.

Ошондой эле 1999-жылы туулган З.Г. менен 1975-жылы туулган Ш.А.нын баш сөөгү жабыркап, жандандыруу бөлүмүнө жаткырылган. Алар кырсыктан алган жаракатынан улам 10-11-январь күндөрү каза болду.
Жабырлануучу тараптагы маалыматтар боюнча, айдоочулардын бири — 1986-жылы туулган С.Н. 8-февралда 1 айлык мөөнөткө камакка алынган. Ал мурда соттолгон эмес.

Экинчи айдоочу — 1982-жылы туулган З.А. ЖАМКтын Ош шаарындагы мекемесине 9-февралда камакка алынган. Анын баш коргоо чарасы 1 айга камакта калтыруу түрүндө тандалган болчу. Шектүү мурда соттолгон эмес, 5 баланын атасы.

297-берене. Автомототранспорт каражаттарынын кыймылынын жана аларды эксплуатациялоонун коопсуздук эрежелерин бузуу. Этиятсыздыктан оор зыян келтирген транспорт каражатын башкарган адам тарабынан автомототранспорт каражаттарынын кыймылынын жана эксплуатациялоонун коопсуздук эрежелерин атайылап же этиятсыз бузуу, -VI категориядагы айып салууга же эки жылга чейинки мөөнөткө белгилүү бир кызмат ордун ээлөө, же болбосо белгилүү бир иш менен алектенүү укугунан ажыратуу менен II категориядагы эркиндигинен ажыратууга жазаланат.
Эскертүү. Ушул Кодекстин 206-298-301-беренелеринде айтылган автомототранспорт каражаттарына автомобилдердин бардык түрлөрү, троллейбустар, тракторлор жана башка өзү жүрүүчү машиналар, мотоциклдер жана башка механикалык транспорттук каражаттары кирет.
135-берене. 1. Этиятсыздыктан киши өлтүрүү, -II категориядагы эркиндигинен ажыратууга жазаланат.
2. Ошол эле жасалган жосун: 1) өзүнүн кесиптик милдеттерин аткарып жаткан адам тарабынан;
2) эки же андан көп адамды -үч жылга чейинки мөөнөткө белгилүү бир кызмат ордун ээлөө, же болбосо белгилүү бир иш менен алектенүү укугунан ажыратуу менен же ансыз III категориядагы айып салуу менен III категориядагы эркиндигинен ажыратууга жазаланат.
----------------------------------------------------------------------------------

Перизат Козубекова Ош шаарындагы лицейди 2017-жылы аяктап, Ж.Баласагын атындагы Кыргыз улуттук университетинин англис тили факультетинде жогорку билим алып жаткан. Ошондой эле каратэ менен машыгып, комуз жана гитара чертчү. Анын артында ата-энеси жана агасы калды.

«Оор басырыктуу, токтоо мүнөз, жароокер Перизат келечекте англис тилчи мугалим болууну эңсеп, алдына чоң максаттарды койгон эле. Жаткан жериң жайлуу, топурагың торко болсун. Ата-энесине, бир туугандарына сабыр тилейбиз», - дешти мугалимдери.

Перизат Козубекова----------------------------------------------------------------------------------

Мукамбет Шайдуллаев ата-энесинен айрылгандан кийин жалгыз иниси менен калган. Жубайы экөө алгачкы перзентин тарбиялап жаткан эле. Учурда уулу болгону 1,5 жашта.

Кырсык болгон учурда анын жанында 27 жаштагы жубайы да болгон. Ал катуу жаракат алып, дарыланып чыкты.

Пикирлер
Для добавления комментария необходимо быть нашим подписчиком